想學返兩招職場生存之道嘅觀眾，就要留意28號晚播出嘅《玲玲友情報》喇！因為呢集麥玲玲請嚟「職場女王」Son姐張慧敏做嘉賓，同大家講下新人入職要點做。
玲玲師傅忠告新人守時很重要，佢笑言當年為咗加強喺公司嘅存在感，會提早一個鐘返到公司，令老闆記得自己，佢仲乘機放閃讚老公何德守時：「佢從來唔遲到，返30年工從未遲過到，所以佢好痛恨伙記遲到，呢方面佢好嚴謹，覺得係一個承諾，有15分鐘走趲已經好夠。」仲話試過有員工9點20分返到公司，都已經被佢老公照肺，反問對方：「你簽合約嗰陣唔係 9 點返工咩？」身邊嘅Son姐聽到即霸氣回應：「如果你老公係我上司或者老闆，我會問返佢 『你合約夠寫 6 點放工，我噚晚放幾點呀？』」引嚟哄堂大笑。
呢集節目唔只一如以往貼出人夫何德嘅相片，配以改圖增加效果，又爆老公「苛刻」。玲玲師傅接受訪問時直言老公唔會介意：「表揚佢唔遲到同認真，而且佢真係咁。每次節目放佢張相出嚟，佢都好開心㗎，仲話最好集集都有。」另外，玲玲師傅表示有同老公講時移勢易，唔好太在意員工遲到。
Son姐作為「職場女王」，自然要畀啲打工仔上班貼士，佢話：「想人留低印象，一係你好靚仔，又或者好有性格。如果唔係主動啲去介紹自己同人『say hi』，唔好諗咁多做多啲。」佢又提到過往自己喺公司表現出眾，獲老闆喺大會中表揚，佢補充話：「佢唔會唔記得我囉，(我)生得靚已經係有着數，仲要唔係靠美貌，係靠實力喎。」霸氣中不失幽默感，不過最後佢都選擇辭職，最終創立獵頭公司。
不過 Son姐慨嘆時勢唔同，過往員工都打聽升職加薪方法，但而家反而係千方百計拒絕升職，佢話：「以前升職加薪，而家係加『辛』。啲人唔想升職，係驚責任大咗壓力增加。」佢忠告新人返工要帶腦同夠主動，唔好齋坐、齋問等運到：「見工時你已經知道份工要啲乜嘢，唔好成日淨係問，或者坐喺度等，跟住話『佢都冇叫我做』，呢啲態度唔好話份 工打唔打得長，自己都學唔到嘢。」
《玲玲友情報》逢星期三 22:00 J2 82台
