由林肯監製、黃秉怡編審嘅TVB新劇《婚後事》（《Happy Ever After？》），逢周一至五晚九點半翡翠台播映，噚晚（28號）第三集甘誠鈞 Davey（黎諾懿飾）與紅顏知己兼女友Gina（賴慰玲飾）贏盡焦點，Davey、潘善仁 Tim（羅子溢飾）及張明芯 Emma（陳自瑤 Yoyo 飾）嘅大學回憶亦惹起高度關注。劇情講述大學時期對Emma一見鍾情口嘅Davey，喺追求女方時竟然發現Emma早已情傾Tim；為咗成全好友，Davey收起心意及刻意迴避Emma，但偏偏Emma愛屋及烏，連番鼓勵當時欠債嘅Davey，令Davey更加愛在心裏口難開……
陳自瑤、羅子溢及黎諾懿以青春打扮合體，掀起網民「四葉草集體回憶」，三人昔日青春「四葉草」靚樣更喺網上翻Hit。觀乎網上流傳《四葉草》系列宣傳照，當年諾懿及子溢一個傻氣、一個帥氣，Yoyo青春無敵甜笑樣更係極之吸睛。三人拍攝《婚後事》大學場口，亦有不約而同想起昔日拍攝《四葉草》嘅珍貴點滴，黎諾懿搞笑謂：「我哋拍緊《四葉草8之老草後生了》。」Yoyo對於曾與黎諾懿合作拍《四葉草》完全零印象，令諾懿大感傷心難過。
噚晚第三個討論點，落喺終於正式出場嘅王敏奕身上。飾演「致命誘惑」Mira嘅王敏奕，為咗演活外在條件極為吸引嘅「戀愛腦文青」，劇中無論舉手投足散發極致嘅女人味及誘惑感。雖然敏奕噚晚出場時間唔多，只與Davey作出短暫式針鋒相對，已令網民留下足夠深刻印象，大讚敏奕突破固有憨直框架，成功殺出新血路，「原來家嫂可以咁姣」。第四個討論點就係被指演技進步唔少嘅子溢身上，噚晚當善仁與Davey分享點樣飽受Emma逼迫，以及Emma報復行動係有幾自私時，眼神流露不甘及怨恨，更激動得頸上青筋一條條清晰地暴現出來。
《婚後事》周一至五晚九點半翡翠台播映