以多角度探討愛情與婚姻世界嘅《婚後事》，繼以羅子溢同陳自瑤角色嘅視點揭開序幕後，28號晚播出嘅第三集，輪到以黎諾懿角色嘅視點嚟講故事。
喺首集表現出一副情場浪子嘅黎諾懿，估唔到其實係個癡情男，暗地裏一直守護羅子溢同陳自瑤，呢個反轉令觀眾相當愕然。
除咗反轉令大家感到意外，呢集黎諾懿同賴慰玲嘅三場戲亦相當搶焦，首先係喺劇集播出前已經掀起連番熱話嘅「鴛鴦浸浴戲」。呢場戲除咗黎諾懿以全裸姿態上陣外，佢同賴慰玲一齊浸浴時嘅姿勢相當親密，兩人唔只有熱吻鏡頭，賴慰玲手搭住黎諾懿嘅膝頭之餘，其中一隻腳仲纏喺黎諾懿腰間，令人想入非非。賴慰玲喺劇集開播前曾經提及呢場戲，佢大讚黎諾懿係一位好拍檔，可以令佢喺百分百安心嘅情況下完成拍攝。
第二個焦點就係黎諾懿同賴慰玲嘅嗌交戲，劇中嘅賴慰玲面對憤怒嘅黎諾懿，以極冷靜嘅一面一字一句回擊對方，當中當黎諾懿問到賴慰玲，點解自己身邊咁多女人，但偏偏賴慰玲係要針對陳自瑤？賴慰玲冷靜咁回應：「就係因為咁多年嚟，你冇得過手，亦都冇出過手，咁先證明到佢喺你心入面地位同其他女人唔同。」挑明黎諾懿對陳自瑤嘅偏愛。
而第三個看點，就係黎諾懿同賴慰玲和好嘅一場戲，當中黎諾懿自揭多年嚟唔追陳自瑤嘅真相：「佢哋要嘅愛太神聖，想要結婚，然後結完婚，稍有差池，就不堪一擊。」之後黎諾懿仲講出屬於佢同賴慰玲嘅愛情觀：「我同你係另一種人，我揀你唔係因為你有幾叻、幾咁大方，而係無論我哋幾咁壞、幾咁不堪，我哋都會為對方照單全收， 呢啲先係我哋想要嘅愛情。」
短短數句唔只突顯賴慰玲角色嘅睿智與忍功，亦展現黎諾懿對陳自瑤嘅疼愛同深情，同時亦反映咗兩pair人截然不同嘅愛情觀。
《婚後事》逢星期一至五 21:30 翡翠台
