歌唱真人騷《中年好聲音 2》今個期日晚 (3月3日)會播出《九強戰！聲夢學員中二合唱！》，10強選手將與《聲夢傳奇》學員拍住上爭奪9強席位，繼續有肥媽、伍仲衡、 張佳添、周國豐及陳慧嫻擔任評審。 
是集「中年X聲夢」聯乘令觀眾引頸以待，一眾熱愛唱歌、勇敢追夢嘅好聲音打破年齡界限，擦出不少火花。42歲顏米羔夥拍27歲彭家賢（Zayden）獻唱 《紅色跑車》，並雙雙以紅色外套上陣十足十兩兄弟，佢哋更特意為演出設計小舞步，Rock爆舞台。伍仲衡大讚有穿透力：「呢啲歌顏米羔實食冇黐牙，你好啱唱Rock歌，好有火，Zayden今日做咗助攻，唔搶之餘好幫到米羔個Vocal。」張佳添則笑言：「感覺好正，好似哥哥帶住細佬揸架紅色跑車去溝女。」 
一向形象鮮明嘅陳俞霏與XiX齊齊以Y2K打扮上場，勁歌熱舞獻唱《全身暑假》，散發魅力舞台，主持車婉婉笑笑口話：「好似媽媽帶啲小朋友去 Playgroup 咁！」周國豐笑言：「俞霏真係要多謝呢5位小妹妹，好青春活力，令到我呢啲叔叔睇完好開心，即使有個媽媽陳俞霏喺度，成件事都好有說服力。」陳慧嫻聞言即加把嘴笑指：「我加入都好有說服力，完全唔覺得俞霏係媽媽，最多係似大咗兩年嘅家姐。」
41歲嘅沈宗賢同15歲嘅趙紫諾（Sabrina）獻唱《一眼瞬間》，兩人係年齡差距最大嘅一組，足足相差26年。宗賢係出名嘅重炮手，Sabrina擁有一把雄渾聲線，最終擦出不一樣嘅火花。雖然Sabrina廣東話進步咗好多，但普通話出名水皮嘅伍仲衡仍堅持對住Sabrina講普通話：「Sabrina唱得很好，但是你很像很怕他，好像被迫的！」陳慧嫻都有同感：「宗賢今次係最有男子氣概嘅一次，但就好似蝦緊 Sabrina咁，感覺唔似一首情歌。」張佳添笑指：「15歲妹妹對住40幾歲叔叔，你想佢點啫，我合埋眼聽已經好開心！」
不同嘅組合為觀眾帶嚟唔同驚喜，出場名單仲有《我真的受傷了》黃劍文＋金永衡、《一加一》林若盈＋趙小婷、《我不難過》安雅希＋黃洛妍、《敢愛敢做》譚輝智＋趙頌宜、《我們的愛》劉威煌＋劉倩彤、《祝君好》古淖文＋冼靖峰、《灰色》陳蒨葶＋文凱婷。
《中年好聲音2》逢周日晚 8 點 30 分翡翠台播出