由林肯監製嘅《婚後事》星期五晚播出第5集，劇情講到張明芯( 陳自瑤 飾)同潘善仁( 羅子溢飾)離婚後，備受嚴重失眠問題困擾，要靠飲酒甚至服藥先可以勉強入睡；不過即使成功入夢，明芯仍未能擺脫善仁，經常夢到溫柔嘅善仁…
日夜備受困擾情況下，明芯終因休息不足暈倒…為咗跳出困境，明芯喺心理醫生若雪( 陳庭欣飾)建議下相約善仁見面…另一邊廂，對明芯尚未忘情嘅善仁，嘗試積極重回正軌，不過當同明芯再度碰面後，善仁因敵不過明芯嘅魅力同佢發生關係；原本以為一夜歡愉後可以同明芯重新出發，可惜最終竟發現對於明芯來講，一切只係告別儀式…
呢場一分半鐘嘅纏綿激情場口，Yoyo唔單止豁出去大騷白滑美背，仲同子溢攬到實兼錫得極之肉緊，睇到觀眾熱血沸騰。而出名大隻嘅子溢，即使瞓喺張床，結實嘅胸肌依然相當搶鏡，整體肌肉線條都突出又勻稱，而另一場身穿緊身黑tee演出嘅子溢，一雙麒麟臂同樣唔嘢少。網民對於子溢嘅完美身材，更加洗版式留言大讚，討論度不輸Yoyo露背。
為演活善仁呢個角色，子溢開劇前刻意減重超過10磅，希望演繹起憔悴狀態嘅善仁時更有說服力，子溢受訪時笑言：「監製嫌我太強壯，想我文弱啲，所以我就開始節食，都係多啲做帶氧運動，同埋用168減肥法，少啲食肥膩嘢，咁就慢慢瘦落嚟。」即使成功減磅，但一雙麒麟臂依然好厲害，「手臂係因為之前剩落嘅，佢好有用處，就係可以幫啲女士遮穿崩位。」講到演繹善仁一角大受好評，子溢感激各方支持同鼓勵，佢話自己睇劇本時睇一次喊一次：「可能做咗人爸爸，又有個女，一睇婚姻對個女嘅影響即刻『嘩』咗出嚟！如果早幾年未必感受咁深，依家睇真係好有同感。」
劇中亦穿插唔少善仁同明芯嘅溫馨回憶片段，喺之前集數中吵得面紅耳熱嘅明芯同善仁，原來當初亦曾有過美好回憶，Yoyo同子溢演繹甜蜜場口亦相當到位，簡單一個眼神已充滿愛意，同其他決裂場口形成強烈對比，令觀眾為二人嘅分開更覺婉惜。
《婚後事》星期一至五晚 21:30 翡翠台