緹現代男女結婚後唔同角度面對婚姻、感情同現實生活嘅《婚後事》，播出短短一星期評價就越來越高，而星期五播出一集有兩場相當重要嘅「女人交」戲份，兩場主角都係張明芯( 陳自瑤 飾)，對手就分別係上半場嘅Gina( 賴慰玲 飾)同下半場嘅Mira( 王敏奕 飾)。
上半場佔上風嘅係Gina，雖然明芯同佢原本係好姊妹，不過因為Gina心知自己嘅男人甘誠鈞 Davey( 黎諾懿 飾)多年來一直未能放下明芯，兩人早已心存芥蒂， 即使之前出動水軍協助明芯攻擊善仁( 羅子溢 飾)同親生妹妹Mira，Gina其實另有盤算。
深知自己對Gina有所虧欠嘅明芯，完成離婚官司後專誠向Gina致歉，以退為進對拉Gina落水表示歉意，Gina亦非常配合為明芯雨過天晴表示高興，但明顯刻意迴避同明芯深入討論。明芯只能以Gina同Davey結婚一事打開話題，豈料反而撞板，被拮中要害嘅Gina即時爆Seed，直接回應一句「Hold起咗」，當明芯追問原因時，Gina仲即冷笑表示：「因為你咯」，句句有骨落地，講時眼神更相當銳利，皮笑肉不笑嘅狀態予人「棉裏針」感覺。
為打圓場，明芯即向Gina大派定心丸，Gina先故作睇化，之後再繼續發功：「我諗去到你有 第二春，佢都未必肯做老襯」。而敵不過Gina「咄咄相逼」嘅明芯只能以笑遮醜，並故作活潑以「講呢啲」結束對話。
下半場明芯則佔盡上風，呢集尾段Mira再度現身並直闖明芯office激動理論，強調自己冇勾引善仁，，更質問明芯為向善仁報仇，竟妄顧會令女兒心靈創傷，更狠狠拋下一句：「你點做人阿媽㗎？！」
原本同Mira針鋒相對嘅明芯，聽到後即攤坐椅上，無奈之餘又以極尖酸眼神回敬Mira：「其實我真係好想好似啲八婆戲咁， 兜巴兜巴咁星落你度，不過我唔同你呀，我做人知羞恥。」然後再極度不屑咁話：「如果你真係好想要阿Tim嘅，咪攞去囉，橫掂有理冇理呢個男人我都唔會要，你根本就唔配做我對手。」
之後佢再冷眼直視Mira話：「如果唔係阿Tim一 早揀咗你啦。」呢幕戲Yoyo無論眼神定係語氣，都演活明芯充滿心計一面，加上王敏奕一臉入世未深嘅不甘演出，整場激辯場面都充滿戲味。
《婚後事》星期一至五晚 21：30 翡翠台