再見‧枕邊人｜心機女張曦雯大騷最強Body 黃智雯壁咚戲主動撩怕醜仔羅天宇

懸疑劇《再見‧枕邊人》劇情緊湊， 星期五晚播出嘅一集，除咗女主角顧晴天( 黃智雯 飾)被展開報復行動嘅黎秋( 李啟傑 飾)擄走，幾乎葬身火海外。表面處事圓滑、善解人意嘅頂級公關朱善美( 張曦雯 飾)亦幾乎被熱烈追求自己嘅富家公子周冠中( 翟威廉 飾)落藥迷姦，幸未婚夫楊萬森( 馬德鐘 飾)及時出現英雄救美，先幸保不失。

被翟威廉狂追嘅Kelly呢集被落藥，好在最後幸保不失

但其實朱善美一早發現周冠中偷偷落藥，機智將有迷藥嘅酒吐出後，向萬森發送SOS訊息，博取對方嘅關心。呢一幕Kelly完美演繹出為愛不惜一切、機關算盡嘅「心機女」手段，Kelly嘅「最強Body」同樣搶鏡，著住白色露肩魚尾裙嘅佢大騷S形身段，直頭係天使同魔鬼嘅化身！

馬神危急關頭出現英雄救美，不過其實一切都喺Kelly嘅計劃當中

對於呢場迷姦戲碼，Kelly表示同翟威廉識於微時，初入行時已相識，而且翟威廉相當有紳士風度，拍攝前溝通充足，因此絕無半點尷尬，反而令Kelly感到非常放心。Kelly大爆翟威廉對出演呢個斯文敗類周公子角色有意見，加上佢同「馬神」馬德鐘之間嘅淵源：「佢話『點解我成日做禽獸角色？！』，尤其係同馬神一齊，次次都係馬神做英雄，好搞笑！」

Kelly呢集嘅打扮真係引死人

至於身穿嘅套誘人戰衣大騷蜜桃臀，Kelly就歸功幕後同事：「呢個唔係淨係我操得fit就可以呈現，都要配合camera、燈光、服裝，所有人夾埋一齊先做到呢個效果。」Kelly稱身形同美色係朱善美嘅絕密武器，之後將繼續發揮「男人殺手」本色。

另外，晴天因安全問題搬到金長勝( 羅天宇 飾)嘅律師樓居住，「同居」生活就此展開，二人合體擦出唔少火花，場面搞笑又浪漫。對首次同羅天宇合作，Mandy直言開拍前已大感期待，對方印象中係一名怕醜仔，但喺劇中角色卻完全相反，仲形容佢為「2024年版Law霸」。

而Mandy同羅天宇首次合作，仲話要融化呢個怕醜仔

為增加呢對「晴勝CP」嘅趣味性，Mandy透露開拍前主動同天宇溝通，亦一齊設計小動作：「劇中一啲默契小事件或小動作，都係我哋一齊喺現場諗。我好享受亦好開心同到天宇合作，今次自己take咗比較主動嘅role，成日整鬼佢，爆發佢曳嘅小宇宙！」

當中唔少有趣小動作其實都係Mandy同Joey嘅創作主意

Mandy仲分享其中一個壁咚畫面印象深刻，踢爆天宇怕醜又緊張！Mandy話：「同其他男藝人拍親熱戲，多數係個男仔做主動去畀安全感我，但今次角色調轉咗，我知天宇比較怕醜，所以我會主動啲，去令佢安心、唔需要擔心唔需要驚。我哋非常專業，度好晒位去拍呢啲場口，但見到佢面紅耳熱就覺得好搞笑！」

《再見‧枕邊人》星期一至五晚 20:30 翡翠台