由 阮兆祥 李思捷 王祖藍 主持嘅全新節目《福祿壽訓練學院》，稍後就會緊接《中年好聲音2》推出，今次更係香港首個扮嘢真人Show，福祿壽三子今次足足相隔6年先再度合體亮相TVB綜藝節目，不過最近兩年都有 「限定合體」亮相台慶夜炒熱氣氛，好似去年祥師兄就同思捷、祖藍先後惡搞「林加洞」、「拜金」同「淋作」引爆熱話喇，單係李思捷嘅「拜金」精華片段，短短一星期當狂吸逾80萬點擊，令人更期待今次正式再合體。
據知《福祿壽訓練學院》將採取淘汰制，集緊張、 殘酷啜核於一身，而為緩和氣氛，製作組特意邀請兩位「傻大姐」擔任主持兼 「冷」場，分別係同樣參選港姐出身嘅 郭珮文 同 陳懿德 。
製作組亦率先曝光三位導師以及Juliana試造型嘅宣傳照，合作無間嘅福祿壽影宣傳照絕對Easy Job，佢哋無論笑容同甫士都相當一致。
今次宣傳照重點可以話集中喺Juliana身上，身材驕人嘅佢以日本著名動漫《鬼滅之刃》中嘅戀柱造型現身，心口開窿造型性感又忠於原著設計，細節亦跟到足，一頭Shocking Pink加金黃大孖辮假髮，加上眼下兩粒銷魂癦，配以Juliana嫣然一笑，電力非常驚人。Juliana對造型亦信心十足，更俯身大擺心心手勢吸Likes。
據知， Juliana仲會以其他「話題性」造型上陣，保證令大家充滿驚喜。而今次獨欠德德嘅造型宣傳照，據知首次擔任綜藝真人騷重點主持嘅德德，知道Juliana以「戀柱」造型打響頭炮後，即感到沉重壓力，仲將以意想不到嘅動漫造型亮相。不過為保神秘感，所以暫時未公開，暫時只公布將係「麻煩度200%＋遴迍度150% 」造型。
節目經過超過半年招募，製作組最終喺幾百名進入海選嘅參賽者當中，為福祿壽精挑細選最終極又別具扮嘢潛能嘅入圍者，呢批終極入圍者將接受福祿壽悉心調較，爭奪成為扮嘢接班人。不過要踏上扮嘢王嘅旅程絕對腥風血雨，為增強刺激感，福祿壽亦將「內鬨」分成三隊進行明爭明鬥，揀選心水隊員過程仲要歷盡考驗，記得留意節目嘅最新消息喇！