詹天文踏入18歲與過百Fans慶祝 願望考入心儀大學植髮遮高額

參與《聲夢傳奇》出道嘅小妹妹 詹天文 ，唔經唔覺已經踏入18歲正式大個女，早前一班Fans就為Windy舉行生日會一齊慶祝，過百人齊齊為佢唱生日歌，而壽星本人當然亦為大家獻唱啦。

Windy亦現場公開自己嘅生日願望，除咗希望即將來臨嘅DSE文憑試可以獲得好成績，又想入到心儀大學，不過另一個神秘心願竟然係想植髮喎。Windy話早喺16歲已經有呢個諗法，仲係因為覺得自己額頭髮線太高，所以希望更美觀呀。

日前完成中學畢業營嘅Windy，同一班同學度過開心又難忘嘅三日兩夜，而媽咪竟然驚喜送上蛋糕，令佢中學最後時光都可以同大家一齊慶祝，而同學亦送上一本非常厚又充滿心意嘅相冊，令佢非常感動呀。

踏入18歲又即將面對人生另一階段，Windy就話除咗本地大學之外，亦同時會考慮到外地升學，亦會面試波士頓伯克利音樂學院，希望有機會可以提升自己流行音樂方面嘅學識呀。