魏嘉信發力跑震懾中聲家族 何廣沛被周志康封籃板王

周吉佩、吳大強、支嚳儀 同 陳蒨葶 等一眾兩季《中年好聲音》戰友參與跑步活動，出發前大家仲浩浩蕩蕩一齊熱身聲勢十足，跑完三公里之後大家都面不改容，當中 魏嘉信 仲遠遠拋離隊友，賽後佢話已經講明會認真跑，點知無人信佢，所以就以成績證明畀大家睇。

而吉吉同陳蒨葶笑住扮魏嘉信起步前故作輕鬆嘅姿態， 鄭梓浩 話見到魏嘉信嘅戰略，就知道佢起步後就會爆發潛能，而 顏志恒 補充指起步無耐已經連魏嘉信嘅尾燈都睇唔到。

Bill哥哥喺年齡上雖然同大家有一段距離，但佢都好享受整個運動過程，仲分享自己做運動心得係持之而行，平時堅持做運動，佢話較多喺屋企做吓健身同掌上壓同埋放狗。

身為晚輩嘅吉吉就話自從參加《中年好聲音》之後，呢次先係佢第一次做運動，不過支支就話其實唱歌都算係做運動。講到跑步姿勢最令大家推崇，一定要講到尹新杰，因為佢係扭住腰嚟跑。梁浩賢話跑步可以順便練氣，就好似佢哋呢日就邊跑邊唱《不再猶豫》。

同場仲有 何廣沛 同 周志康 擔任表演嘉賓，唔講唔知，原來廣沛最近同志康成為隊友，加入咗對方嘅籃球隊。廣沛話受到身邊兄弟感染，令平時做運動被動嘅佢，突然多咗個動力去做。志康就大讚廣沛體能好好又跳得高，喺籃球場上完全係搶籃板高手。