啱啱先公布將為人父嘅 林奕匡 今年亦係佢經典歌曲《高山低谷》推出10周年，早前佢更應邀參與日本著名音樂頻道The First Take(TFT)嘅一鏡到尾錄音演出，演繹全新編曲版本嘅呢首成名作。
雙喜同臨嘅Phil亦同歌曲監製 Edward Chan，以及作詞嘅 陳詠謙 開Live，分享參與TFT嘅感受同將為人父嘅心情。Phil係第3個參與The First Take錄音嘅香港代表，一早仲為今次做足準備：「我哋重新度過首歌嘅編排，同埋唱法都唔同咗，會諗下受眾係邊個，唔想一模一樣嘅感覺去唱，因為都事隔10年，自己嘅人生同經驗會令自己有唔同感受。我都有練習多啲，仲特登買咗喺正式錄音時會用到嘅Headphone喺屋企練習，又會睇下唔同嘅表演者喺TFT佢會點唱，台風係點，又研究下鏡頭擺位，自己喺屋企事先預演一次，希望可以減低緊張程度。」
不過Phil亦提到錄音時依然免不了緊張：「入錄音室緊張一定有，但估唔到原來大家平時見到個畫面好似只有自己一個人喺度，但入到去其實鏡頭後有最少接近30人喺度準備，所以有啲意想不到，到正式錄音時，大家就會全部離場。」
影片段可見Phil完全陶醉於音樂之中，中段唱到肉緊更緊握拳頭！而錄音後，Phil更大鬆一口氣：「第一時間諗到『Oh My God! 錄完喇！』因為籌備期間練習幾多次都好，正式嘅時候係有好多Pressure，但完成嗰一下成個人即刻放鬆，可以真係Enjoy The Moment多啲，我仲同每個同事都擁抱，哈！」
今次喺《高山低谷》推出10周年登上TFT，Phil坦言係莫大榮幸，仲話：「希望可以俾全球認識廣東音樂。」歌曲對佢更係別具意義，因為當時係決定自己歌唱事業嘅作品，更一直銘記歌詞內容：「《高山低谷》記載住我人生好重要嘅一刻，由最唔開心到我企得返起身，而家呢首歌成為咗鞭策我嘅歌，佢唔係淨係講低谷要點樣面對，佢仲可以講到喺人生唔同期間，都會遇上唔同高山低谷，時刻提醒我要繼續行落去，個終點依然未達到，所以唔可以停唔可以放棄，就好似歌詞咁講：腳下路程難以削短。」
而噚晚開Live時，陳詠謙亦提到《高山低谷》歌名嘅由來：「本身未有歌名，係先寫咗『你界定了生活 我侮辱了生存』呢句，但前面加多句『你快樂過生活 我拼命去生存』，令成份歌詞有一份推進。後來見副歌前有三連音的部份，想到『高的山低的谷』呢幾隻字，加上香港好多山，有錢人又多數住喺半山，配合埋前面歌詞，就有呢個歌名。」
雖然參與完TFT，加上將為人父正值人生美好時光，不過Phil就指會繼續鞭策自己：「我唔覺得自己而家喺高山，因為覺得可以再好啲，同時亦都會提醒自己唔好俾自己入到低谷，繼續鞭策。」
而提到BB時，Phil就難掩將喜悅笑說：「開Live前啱啱陪太太睇完醫生，BB又大咗好多，夜晚又有另一個BB TFT出世，的確係開心！」