話題劇《婚後事》當中，千呼萬喚嘅「致命誘惑」Mira( 王敏奕 飾)終於登場，以Mira視角呈現嘅劇情曝光，故事驚人反轉再度震撼觀眾，原來喺Mira嘅睇法，佢並非存心勾引阿Tim潘善仁( 羅子溢 飾)，因為深信「毫無保留去愛一個人係人世間最幸福嘅事」，仲有「愛一個人根本控制唔到， 點分啱同錯」嘅戀愛腦。加上又係文學愛好者而情傾善仁，不過為顧全善仁形象同家庭，Mira只敢遠觀不敢褻玩，甘於為善仁犧牲所有，又天真咁希望喺善仁身邊甘於做守護天使。
可惜Mira嘅盲愛並未得到世間認同，當「婚後事」嘅小說一曝光，Mira就受盡千夫所指；不過最令Mira痛心嘅並褂被誤會係姣精，而係出賣自己嘅竟然係親生家姐Gina( 賴慰玲 飾)同善仁！喺善仁嘅小說中，Mira被塑造成係是婚外情嘅主導者，令自覺一直努力壓抑對善仁感情嘅Mira崩潰爆喊，更直接搵善仁當面對質…
呢集Venus展現出唔同嘅演技，先演活墮入愛河嘅甜蜜、被背叛同出賣嘅悲憤、被誣衊嘅不甘，仲有忠於自我嘅執著；喊戲連場嘅佢仲獲觀眾讚連「喊樣都靚過人」，向鏡頭放電表情仲被指有致命吸引力，大讚佢演技進步又可塑性高。
呢集眾多場面當中，先係後樓梯鬧爆出賣嘅自己家姐Gina，緊接嘅同善仁「攤牌」一幕，長達分半鐘獨腳喊戲、展示委屈、絕望、不甘、歇斯底里等唔同層次情緒，甚考演技。不甘被描繪成「邪花」嘅佢，強忍淚水道出付出同委屈：「我從來冇試過咁樣勒住愛一個人，無論有幾愛，我都冇做多，亦唔敢做多」。
之後Tim道歉時，Mira情緒即被觸動眼淚缺堤兼歇斯底里謂：「我唔係要聽你講對唔住呀！全世界點話我都可以，我可以吞咗佢、可以匿埋，我以為你最明白我，我亦都最明白你。我以為喺你面前，我係最好嘅我，我以為你愛嘅係我嘅好。」
Mira愈講愈傷心：「你同全世界原來都係一樣，都係當我姣花蕩婦，呢段根本都唔係愛情！」加上以外遇為主題嘅《無人之境》作配樂，令唔少觀眾都非常期待第7集回歸善仁視點後係版本又係點樣交代外遇故事。
