衛詩雅 近年除咗演出唔同角色都被讚表現之外，又同步拍攝唔少有趣影片於影片頻道分享，而近日佢又有新搞作，接受 新城廣播 知訊台 嘅全新節目「新手DJ大鳴聲」挑戰，應節目監製 范振鋒 邀請，成為首位參與挑戰做新手DJ嘅藝人，更獲Ricky即場傳授「DJ秘技」，打頭陣嘅Michelle，首嘗任DJ感覺，「試工」時仲獲知訊台台長 程凱欣 從旁扶助，大讚Michelle聲線「有戲」，加入DJ界絕對合格呀。
作為見習DJ嘅Michelle，首次走入控制室，對所有專業器材都大感好奇，更主動向范振鋒提出親自操作錄音節目。佢仲為呢次主持嘅一小時錄音節目做足準備功課，一早揀定8首播放歌曲，又為每首歌寫定講稿，非常認真，難怪台長程凱欣大讚佢合格啦。
不過到正式準備開咪錄音時，Michelle就似乎非常緊張，被控制器上密完麻麻嘅大埋按鈕嚇窒，變得手忙腳亂不知所措，佢仲笑道：「真係好忙呀！好多掣要郁，同埋好似股票咁好多個mon呀！」
經過師父范振鋒細心教導後，Michelle好快就上手，而佢以DJ身份喺節目播放嘅第一首歌，就係同公司 張敬軒 主唱嘅《青春常駐》，佢仲以一把相當感性嘅聲線介紹話：「兩年前，同爸爸媽媽去旅行，忽然發現佢哋嘅背影老咗好多，喺呢度想同佢哋講，祝佢哋青春常駐！」在場嘅程凱欣同范振鋒都被感動。
完成錄音之後Michelle仲興奮笑問程凱欣：「聽日我係咪可以返工喇？」而程凱欣就滿意點頭，大讚佢聲音有戲，說話表現情深，又補充提醒佢話：「做DJ唔係咁簡單，仲要過五關斬六將！」經過1小時DJ實習後，Michelley話：「以前唔鍾意聽到自己把聲，覺得自己把聲好難聽，但做完1個鐘DJ後覺得好好玩、好有趣！」佢仲笑言：「如果新城可以俾機會，我都好想試下。」之後佢仲話如果成功「見工」，第一位訪問嘉賓都已經諗好：「一定係訪問馬生(新城廣播首席營運總監馬浚偉)同程凱欣，可以乘機向兩位偷師！」