TVB劇集《再見‧枕邊人》逢周一至五晚八點半翡翠台播映，前晚（5日）、噚晚（6日）劇情講到金長勝（羅天宇飾）帶顧晴天（黃智雯飾）探訪癱瘓女騎師Joy（張詩欣飾），讓晴天憶起當年喺印尼出意外後無助嘅自己，立志要寫好Joy嘅故事。
重新執筆嘅晴天，喺前往馬術學校路上偶遇楊萬森（馬德鐘飾），二人一同訪問Joy教練（李泳豪飾），勾起不少昔日回憶。Joy病情惡化，晴天決定趕快替佢完成有聲書，並搵萬森合力完成，可惜未能趕及，Joy已離開人世。有聲書試播當日，播出不少Joy於意外前嘅片段，包括騎馬、擦馬、做健身等，配合晴天嘅聲音導航，完全感受呢股正能量！
飾演癱瘓女騎師Joy嘅演員張詩欣，憑《愛．回家之開心速遞》演「李莫仇」而為人認識，今次撇甩醜女形象演活癱瘓女騎師，演出相當有發揮。得悉接演因意外後癱瘓嘅女騎師，詩欣受訪時透露喺網上搜尋大量相關資料，嘗試代入癱瘓病人角度，坦言角色有難度：「難道在於點樣拿捏一個癱瘓病人嘅狀態，Joy 只係剩低個頭可以郁，基本上長期瞓床。前期嘅Joy好勇於面對，後期知道自己病情惡化會有情緒，所以唔同時期，眼神、表情、語氣都有唔同。」為咗更投入角色，詩欣喺拍攝當日全程瞓喺床上冇郁，佢又透露收到劇本嗰陣已睇到眼濕濕，再睇更多關於騎師嘅經歷及故事，先發現做騎師並唔易。
每集開首均有點題slogan，而前晚一集為「Follow your heart」，張詩欣認為Joy絕對係跟隨自己嘅心去做任何事：「因為當佢去外國玩馬術時，教練係反對，但Joy決定放手一博。」原本不懂馬術嘅張詩欣，獲公司安排上馬術課程，令佢寓工作於娛樂：「我好開心可以去學，騎馬係我一直以嚟都想學嘅嘢，今次個角色就畀咗機會我。」佢讚黃智雯同馬德鐘係好前輩，前者溫柔體貼，後者風趣幽默：「有一場喊戲，Mandy（智雯）好好，幫助我進入情緒；馬神（馬德鐘）好風趣，令拍攝氣氛好舒服。」
今晚（7日）播出《再見‧枕邊人》，除咗重操故業當記者嘅晴天，被朱善美（張曦雯飾）安插喺心聲、獲得卓越記者獎嘅聞琪（林熹瞳飾）處處針對，劇情講述金長勝嘅故事，原來早於晴天失憶前，兩人曾因一道護身符而相遇，長勝早就認識晴天，究竟靠近晴天真正目的係咩？難道長勝就係晴天嘅加害者？！
《再見‧枕邊人》逢周一至五晚八點半翡翠台播映