Pamela（趙小婷）最近喺《中年好聲音2》助攻林若盈，雖然未能幫對方晉級，但係令觀眾又可以聽到Pamela嘅靚聲演繹。忙於喺大學讀醫嘅阿Pam有堅持更新自己嘅社交平台，日前阿Pam貼出被《聲夢2》畢業生Timothy（陳昊廷）抱起嘅靚相放閃，留言叫大家留意佢哋同遊阿布扎比嘅Vlog，但係大家紛紛留言問佢哋係咪拍拖，連導師陳奐仁都回覆：「正式放閃！」
雖然阿Pam未有回應網民兩人係咪拍拖，但係翻查佢嘅社交平台，不時貼出佢同Timothy嘅合照，又不時拍片合唱，之前喺聖誕時佢哋一齊拍COVER聖誕歌，片中流露住陣陣小情侶嘅氣色，而最近嘅旅遊Vlog入面，Timothy同阿Pam同遊杜拜、阿布扎比等多個中東地方，仲一齊拍片分享當中見聞，見兩人甜蜜互動，似係拍咗拖好有一段時間，而《聲夢2》另一位成員趙頌宜亦留言話「自己失戀」似係早知Timothy同阿Pam嘅戀情。
兩人如果真係發展成戀人，相信要多謝《聲夢》幕後團隊安排兩人當年合唱出戰之外，仲要多謝賴慰玲，事緣平日好理性嘅阿Pam因為演唱時唔夠放，同孖住好怕醜嘅Timothy接受賴慰玲嘅調教，希望佢哋唱出情歌嘅感覺，唔知係咪呢次合作共同進步，令兩人燃起愛情嘅小火苗? 如果係嘅話，賴慰玲的確係兩人嘅丘比特！
