香港演藝人協會今日（7號）在會長古天樂、副會長余安安、錢嘉樂及一眾新任理事會成員張繼聰、周家怡、岑珈其等率領下舉行春茗茶聚，吸引過百會員踴躍出席，羅蘭、余慕蓮、丁羽、馮素波、邵音音、梁葆貞、黃夏蕙及許思敏等現身支持，場面墟冚。
香港演藝人協會第十六屆理事會換屆大選已喺本年初完成，古天樂連任會長，余安安同錢嘉樂連任副會長，同時有不少新面孔登場，當中張繼聰、周家怡分別當選成為新一屆秘書長及司庫，而岑珈其、張敬軒當選為理事，王梓軒、徐智勇(小肥)、梁棨寧(咸旦)、游學修、雷深如(J.Arie)、趙善恆及鄭文獲邀加入成為特邀理事。多位理事會成員今日一齊出席春茗茶，首度與會員聚會，副會長余安安對於理事會成員「年輕化」表示好開心：「有好多年輕成員參與，因為我哋始終有日會退休，永遠都要有後浪。」
張繼聰、周家怡、岑珈其等幾位新理事成員，首次出席演藝人協會春茗活動，張繼聰希望跟前輩學多啲嘢，嚟緊慢慢再了解吓，繼續幫前輩會員，又為後生會員提供輔助同聯繫，將演藝人歸納多啲類別，令演藝界更團結，而岑珈其想為演藝人協會多搞聚會。
余安安就親製蛋糕慶祝香港演藝人協會成立30周年，仲頒發「傑出演藝大獎」，表揚過去多年來為演藝界付出寶貴青春、貢獻良多嘅前輩藝人，今年由余金珠、徐廣林、高爾珩、周驄榮膺獎項，會長古天樂驚喜現身，周驄喺古天樂手上接過獎座，中氣十足表示：「多謝大家畀我嘅肯定，我想講良心說話，我唔係為個人得獎而來，我真心欣賞演藝人協會，特別欣賞古天樂先生，我擦鞋擦咗幾十年，我估古天樂先生心裡有個願望，係搞演藝人協會轄下老人院。」對此古天樂表示好榮幸頒發獎項給前輩，大讚每位得獎藝人都實至名歸，問到佢係咪如周驄所言有願望搞老人院？古天樂表示：「我都估唔到，因為係非常複雜，我盡力啦！」
余慕蓮（魚毛）喺2020年患上肺纖維化，出席春茗時精神不俗，但身形仍然偏瘦，且走路時要傭人攙扶，問到魚毛健康狀況？佢自言身體狀況麻麻，日前食魚不慎鯁骨，要到急症室，魚毛就話：「喺醫院等咗七個半鐘，好多人，最後都係要留院一晚，先攞番條魚骨出嚟，而家我精神OK嘅，但醫生就話我唔可以跌，所以我唔敢自己出街，一定要有姐姐陪，每朝早七點去公園行，夜晚喺屋企睇兩線劇，睇完就瞓覺；而家開始冇記性，所以都有搵啲朋友打台灣牌，訓練自己。」
