J2（82台）今年再與亞洲電影大獎合作，將於3月10號（星期日）假香港西九文化區戲曲中心大劇院舉行《第17屆亞洲電影大獎》頒獎禮，來自24個國家及地區共35部電影，角逐16項大獎。梁朝偉、黃梓樂、梁雍婷、謝詠欣及導演卓亦謙，分別競逐多項殊榮。當晚王梓軒與陳凱琳擔任大會司儀，而陸浩明（6號）與倪嘉雯（Carmen）則任轉播司儀。日本著名導演黑澤清擔任評審團主席，《飯戲攻心2》導演陳詠燊擔任頒獎嘉賓。韓國影星李英愛獲頒卓越亞洲電影人獎、導演張藝謀獲終身成就獎，表揚二人對電影業貢獻。
首次參與大型頒獎禮嘅Carmen坦言心情緊張又興奮︰「第一次做live司儀加上咁大型典禮，心情難免忐忑，好在拍住6號，有佢喺度信心大增。」為咗頒獎禮Carmen做足功課，不單重溫部份參賽電影，而且熟讀導演、演員嘅背景資料，務求盡善盡美。
今年梁朝偉再度角逐最佳男主角獎，令頒獎禮關注度提升，但佢面對嘅對手極強，特別係主演日本電影《新活日常》嘅役所廣司，去年佢已憑此片贏得康城影帝。資深影評人、浸大國際學院講師皮亞接受訪問時表示，今趟會係兩代康城影帝首次正面對決，他說︰「役所廣司演技爐火純青毋庸置疑，將尋常嘅人物，演出不尋常嘅人生，一直都係佢嘅強項。今次佢做一名清潔工，演出自然流暢，呼聲最高。」
另一位演員吳慷仁已先後贏得金馬獎及電影評論學會影帝獎，實力不容忽視。梁朝偉在強敵環伺下，只能以黑馬姿態出現︰「偉仔今次比過往演出有好大改變，佢板起嘴臉飾演陰沉而攻心計人物，係少見嘅面向。重要係偉仔有主場之利。」
至於最佳女主角方面，皮亞偏好台灣嘅林品彤及韓國嘅鄭裕美，前者去年成為金馬獎最年輕影后，後者剛奪得韓國青龍電影獎及韓國電影製作人協會獎最佳女主角獎，掀起兩影后之爭。
另外兩項受關注嘅大獎，則是最佳電影及導演獎，皮亞斷言係日本片內哄，首先導演濱口竜介的《無邪之境》，會先在最佳電影獎挑戰《新活》，繼而在最佳導演獎挑戰是枝裕和執導嘅《怪物》。導演陳果受訪時直言睇好役所廣司，佢話︰「以役所廣司咁出名嘅演員，演一個平凡嘅清潔男工，無論日常生活同習慣同本身嘅自己，都係兩個世界嘅人物，佢對人物角色拿捏得好準確。」
《第17屆亞洲電影大獎》於（3月10日）晚上8時15分，J2（82台）獨家電視轉播，TVB娛樂新聞台會於下午5時作facebook live，直擊紅地毯盛況。
