林凱恩繼於《隱形戰隊》內飾演被逼為娼嘅受害者後，佢喺《再見‧枕邊人》再挑戰受害者角色，飾演被前男友以「閃卡」威脅、再遇車禍而毁容嘅不幸人，而為咗唔好破壞男友同自己嘅美好回憶，佢更選擇忍痛悄悄離場。
喺12號晚播出嘅一集，由於戲中林凱恩因為爛面而經常戴住口罩，令佢好多時都只可以靠眼神嚟演繹傷感、不甘、崩潰、驚恐等情緒，當中佢多場忍淚戲更加係被讚有感染力。
對於可以挑戰呢個角色，林凱恩感謝監製畀呢個機會佢，講到角色由妝容到心理嘅起伏變化，林凱恩話：「佢本身有一段好夢幻、好開心嘅愛情，但去到最後要悲慘同飲恨咁離場……雖然之前都演過較慘嘅角色，但今次喺愛情方面再慘啲，佢係一個皮肉既受傷、又要放棄自己愛人嘅悲慘角色。」
至於今次嘅特技妝容對林凱恩嚟講亦係新鮮嘅體驗，單係化妝就已經用咗成個鐘，而卸妝亦要用半個鐘，難怪林凱恩話自己邊化妝邊恰眼瞓：「化妝後唔可以笑，唔可以食嘢，因為太大動作兩邊會裂開。同埋都會好痕，化完有少少敏感，但對我嚟講係一個好新鮮嘅體驗。」爛面妝嘅像真程度唔只嚇親林凱恩，就連導演都話唔敢拍得太近，因為驚會出唔到街呀。
劇中嘅林凱恩要上演淒美嘅愛情故事，佢話雖然自己現實中從未經歷過，但自己嘅決定都會同個角色一樣，唔會勉強幸福，必要時會選擇得體離場：「希望借呢個角色畀多啲女仔知道，就算變成點，有自信最重要。」
而張曦雯喺呢集入面，就因為自責一直疏忽對爸爸嘅照顧而相當自責，更因此而崩潰爆喊。呢場約3分鐘嘅情緒戲，張曦雯先後展現出憂慮、釋懷、無力、自責、淒涼五種情緒，就連喊戲都有三個層次！張曦雯受訪時自認係個多愁善感同眼淺嘅人，佢又為觀眾解說，指自己喺馬德鐘面前喊得咁「澎湃」嘅原因：「因為係喊畀馬神睇，專登喊得淒涼啲，要佢覺得我慘，呢個係朱善美其中一個武器，適當時候show軟弱一面，等萬森呵返佢。」
《再見‧枕邊人》逢星期一至五 20:30 翡翠台
