「鬼王」潘紹聰相隔15年重回新城廣播主持嘅《恐怖熱線》於周六（9日）晚上11點首播，邀請任職廣播界多年嘅資深主持兼近期人氣王周國豐老師，現身首集嘉賓大爆廣播界深宵節目靈異事件。
潘紹聰重踏別離咗15年嘅直播室，「鬼王」開咪第一句係感性又帶啲榮耀：「馬浚偉先生(新城廣播首席營運總監)嘅安排，亦可能係聽過呢個節目嘅人潛意識安排。」周國豐以前喺港台擔任DJ嗰陣曾主持深宵節目，當年參加DJ大賽，才藝表演就係講鬼故事，結果勝出咗。但之後卻未有機會主持與靈異有關節目。佢笑言以前常被上司鬧「你有咩叻，剩係識講鬼故」。
周國豐大爆當年唔敢播《夜夜痴纏》及《風之谷》音樂，佢話喺廣播生涯中，慶幸冇遇過咩靈異事件，但如地方有唔妥，佢會感應到唔舒服。周國豐提到播放歌曲：「麥潔文《夜夜痴纏》係唔可以播嘅，除咗呢首，我仲好驚電影《風之谷》音樂。」周國豐又指有太多傳聞係關於《夜夜痴纏》呢首歌，至於《風之谷》音樂，曾有同事喺深宵播出後，發現有小朋友行過。潘紹聰笑指新城以前位處溜冰場，做通宵節目時試過睇到看更叔叔趴喺玻璃上睇，真係有啲恐怖。
周國豐又爆廣播界曾有傳聞，當年有DJ喺做節目中途走咗，咁直播室會放置一本「Log book」，記低每日喺電台發生嘅事。有傳當年呢位DJ喺Log book寫咗「直播室有鬼，我走先」，後嚟呢位DJ已經澄清；周國豐與「鬼王」稱聽聞過蔡楓華都有鬼故事，「鬼王」即表示好想邀請蔡楓華亮相節目求證及親身講吓。