炎明熹與粉絲共度白色情人節 學沖咖啡答謝大家愛戴

炎明熹近日備戰下月舉行嘅演唱會，但係出名寵粉嘅Gigi，喺百忙中都抽空同歌迷一齊共度白色情人節，Gigi噚日現身一間咖啡店，化身一日限定店長，除咗即場學沖咖啡，更向歌迷同附近街坊派發免費咖啡，親民嘅Gigi仲逐一同大家合照，場面熱鬧。
 
平時有飲咖啡習慣嘅Gigi，從未試過用專業手法沖咖啡，見佢細心聽住咖啡師講解每個步驟，繼而嘗試親手磨豆、沖泡、打奶、拉花，雖然第一杯製成品嘅拉花圖案未如理想，但再接再厲嘅Gigi，總算成功完成一杯心心圖案拉花咖啡，之後佢仲品嘗自己嘅作品，露出滿意嘅表情。「其實我冇學過沖咖啡，但好多時開工前都會飲咖啡提神，同埋中醫話我啲血行得比較慢，飲咖啡可以促進血液循環，但我唔會飲太多，同埋我屋企係冇咖啡機，所以今日好開心可以嚟學多樣技能。」
 
化身一日限定「Gi店長」，咖啡店門外等候攞免費咖啡的人龍愈排愈長，「今日係白色情人節，希望可以帶俾大家一種『甜』，無論大家有冇情人，都想藉著今次呢個機會去多謝支持我嘅所有人，同埋今日有另外一個好消息，就係我嘅新歌《透光者》MV，網上點擊已經破咗一百萬，所以好多謝大家。」
 
《透光者》MV上載短短兩個星期獲得如此佳績，歌迷會亦特別準備了蛋糕同Gigi一齊慶祝，令佢相當驚喜。問到近日係咪已經全程投入演唱會綵排？Gigi露出咗為難嘅眼神「我之前講過，希望可以日日做運動、練歌，但手頭上其他工作未完成晒，運動暫時未可以日日都做到，但過埋呢幾日應該會好啲，至於飲食方面，以前我食嘢會好小心，但而家我會講求食得開心，因為當有工作在身，會自自然然控制到胃口。」
 
提到早前喺社交網站公開收集粉絲意見為演唱會請嘉賓，Gigi笑言反應非常熱烈，每一個留言都有細心地睇，仲將部分意見同公司反映，佢話「今次三場演唱會嘅嘉賓，有啲大家有提及過，有啲你哋係冇講過，希望到時可以俾到驚喜大家。」為咗完成三場演唱會，Gigi背後付出唔少努力，問佢完show後最想做什麼獎勵自己？佢諗吓就話「我想喺屋企，因為我都冇乜特別想做嘅事，我又唔鍾意出街，能夠喺屋企，休息一下，已經好滿足。」