婚後事丨羅子溢淚崩哭別煒烈搞喊網民 演活痛症患者憔悴忍痛慘況

《婚後事》噚晚（14號）播出第14集上半敘述視點係天暉（羅天宇飾）， 標題「盡情燃燒 不枉此生」；下半敘述視點係善仁（羅子溢飾），標題「唯有愛 才令人自覺不枉此生」，兩個都係不枉此生，但不枉此生原因卻各有不 同。
子溢真係喊得好心痛。網民讚煒烈好戲。

善仁跟Mira正式分手後，除咗面對父親潘良（煒烈飾）病情惡化垂危，自己痛症愈發劇烈，身心俱疲；惟獨對明芯（陳自瑤飾）母女，善仁先重拾力量忍受痛楚。一生極多包袱及壓力嘅善仁，聽咗父親彌留之言後豁然釋懷，縱然傷心亦選擇放手讓父親離開並原諒父親…潘良離世後，善仁胃出血入院，死裡逃生之際與過去嘅自己正式和解，希望以身作則，感化日益反叛嘅女兒悅悅（鄭淽月飾）。
隔住個Mon都Feel到善仁有幾痛、同埋有幾咁落力忍受痛楚。子溢嘅喊功同內心戲獲一致肯定甚有感染力。

羅天宇上半回發放完笑彈＋粉紅氣泡後，下半回輪到子溢引爆觀眾淚點，尤其潘良臨終前嘅懺悔，以及善仁決定放手讓父親安詳離去一幕，無論係煒烈傾力演出，或者係子溢真誠眼淚，均感動無數網民，更有網民留言尋找知音：「有冇人同我一樣喊咗？」
其實呢幕病發，子溢都做得好真實。

善仁跟過去的自己和解！

噚晚潘良臨終懺悔絕對係兩代演員「高手過招」演技示範，為咗演活臨終病患嘅痛苦，煒烈全程雙眼通紅、哭腔兼聲線沙啞，多次竭力做出唞大氣、有氣冇力及反白眼等狀態；談到場口拍攝感受，煒烈笑言：「我咁大個仔都未試過拍戲要喊足十幾個鐘咁耐。」至於子溢全程完美進入憂心又傷痛嘅狀態，對住彌留父親竭力吐出嘅誠心懺悔，子溢雙眼係痛心嘅淚水，其中一個痛哭位，更哭至嘴尖及鼻尖都有眼淚，感染力滿分。

希望善仁不要再背負太多不屬於自己的事情。

然後子溢演繹被痛症折磨至憔悴嘅場口、勇敢含淚送別病父嘅場口、或是痛心地與過去嘅自己和好，均成功演繹不同程度及形式嘅傷痛；而當對著前妻 Emma（陳自瑤飾）及女兒悅悅 （鄭淽月飾）時，子溢又能精準地演回憐惜及深愛嘅狀態，讓善仁成為有血有肉嘅人，對於喊戲獲讚，子溢開心感謝觀眾支持，坦言喊戲對自己仍有難度，子溢笑言全靠遇到有好對手，談到與煒烈喺醫院嘅兩場喊戲，子溢指自己最喜歡嘅喊戲之一：「因為喺現實入面子溢已經做咗爸爸，從啲小朋友嘅成長你會覺得時光過得特別快，所以有時對住老人家時，你會惋惜冇好好把握以前嘅光陰，所以（嗰場戲）好自然就會好真情流露，好有一種悔疚同傷心，眼淚就會流出嚟，我拍嗰時真係好傷心同個心真係好痛。」
呢個係虛弱嘅慈愛樣。

談到有網民指潘善仁角色「長期負面情緒又繃緊，太入戲好易痴線」，問到子溢拍攝《婚後事》有冇遇上難抽離問題，佢坦言完全冇，皆因佢太渴望完工後馬上享受親子樂：「呢個角色係比較難處理，咁啱嗰時疫情，我每日放工都會自我隔離，變咗畀咗好好機會我專心喺劇本上面。因為唔係自己一個隔離，好多時會同太太或小朋友玩得好開心，就會鬆懈咗。抽離對我嚟講都唔係特別難，因為我心底入面好渴望同自己小朋友玩，一知道唔會傳染到佢哋，就好快投入番自己 （做爸爸）嘅世界！」子溢應要求預告明芯與善仁下周進展：「好多人覺得善仁同 Emma會復合？唔係咁簡單，其實自第15集之後，就會講到去大約6至7年之後嘅時間點，到時我同Emma嘅愛情同人生觀都改變咗好多，咁之後大家再相處到底係愛定需要？」
呢個係昔日仲年青時嘅慈父樣，真係感受到有年齡同 Energy Level 嘅分別。

《婚後事》周一至五晚九點半翡翠台播映