中年好聲音2｜安雅希減肥後被指唔夠氣譚輝智首唱英文歌似便秘？

歌唱真人騷《中年好聲音2》聽晚將播出最終樂章．第二回《決賽前哨戰！歌手助力賽！》由車婉婉擔任主持，繼續有肥媽、伍仲衡、張佳添、周國豐和陳慧嫻擔任評審，8強選手將聯乘8位歌手合唱，爭奪殺入決賽嘅7強名額。

今集出場名單分別係：《一樣的月光》安雅希x林二汶、《Bad Boy》古淖文x谷婭溦、《煩》劉威煌x彭家麗、《浮誇》顏米羔x吳業坤、《多得他》陳俞霏x王馨平、《我要我們在一起》黃劍文x林志美、《That’s why you go away》譚輝智x韋綺姍，以及《征服》沈宗賢x 龔柯允。

「大魔王」安雅希同林二汶合唱《一樣的月光》，一紅一白造型上陣嘅佢哋一唱一和非常合拍，Maggin唱到尾段大曬功架飆高音，不過最近清減唔少嘅佢她被批唱歌唔夠氣，伍仲衡激動話：「減乜鬼肥啫，好明顯聽得出，人瘦咗把聲都瘦埋，感覺唔到我以前鍾意嘅安雅希，你睇吓二汶，佢把聲啲氣幾肥大！」

安雅希同林二汶合唱，但係就被指減肥後表現跌Watt

而肥媽就話：「氣真係要練，唱歌唔係用喉嚨，係要用丹田。」張佳添則指：「如果識用丹田唱歌，肥同瘦其實係冇關係，但係減肥之後，能量可能會唔夠。」

至於被外界指係「最強黑馬」嘅譚輝智同韋綺姍(Rita)合唱《That’s why you go away》，輝智賽前坦言同Rita老師合作壓力大，不過到正式比賽時，首度挑戰英文歌嘅佢同Rita默契十足，唱出歌曲嘅傷痛感覺。

譚輝智挑戰英文歌演出，亦被指太壓抑

之後周國豐更笑言：「你雖然做到個痛苦表情，但你個樣畀我聯想到去廁所去唔到個表情！」而張佳添就指：「呢首歌除咗係英文之外，其實冇乜嘢可以畀到你發揮，你有嘗試用感情去push自己突破框框，但無奈做到有少少急屎嘅感覺！」伍仲衡則笑言：「輝智你做漏咗樣嘢，你要錫Rita老師一啖，你有冇睇吳大強舊年咀咗佢一嘢？」非常搞笑。

同坤哥合作嘅顏米羔假音部必亦受到批評

而顏米羔就孖吳業坤挑戰高難度嘅《浮誇》，兩人一爆一靜擦出不一樣嘅火花，雖然米羔嘅演出充滿激情，但係假音就被指出事，張佳添話：「呢首歌係啱米羔唱嘅，但你要練多少少假聲、換氣，呢首歌係超高難度。」伍仲衡更直言：「聽得出你啲假音太假，真正嘅假音係假得嚟真，輕得嚟重，無力得嚟有力，你可能要研究點唱假音！」到底邊7位選手殺入決賽？記得密切留意聽晚播出嘅節目喇。