香港各個電影業組織近日先後舉辦年度頒獎禮，而憑電影《年少日記》入圍角逐今屆香港電影金像獎「最佳女配角」嘅 韋羅莎 (Rosa) 近來極速減磅10磅，為下月中舉行嘅頒獎禮戰衣努力備戰。
星期五晚亮相導演會晚宴頒獎禮時，唔止被大家指纖瘦散發住少女味，更同S.H.E嘅Ella非常相似。而呢晚同幼稚園同學 蔡卓妍 相遇，更「母子重逢」再遇《年少日記》中扮演佢囝囝嘅 黃梓樂。
難得兩母子團聚，梓樂仲同「媽咪」Rosa撒嬌一齊扮鬼臉，非常溫馨。提及入圍今年金像獎「最佳女配角」，Rosa坦言知道入圍感到非常突然，尤其自己係由舞台劇轉戰電影，得到肯定心情份外興奮，仲因為自己喜極而泣而將親生囡囡嚇到。
Rosa笑言獲提名金像獎之後即決定扚起心肝減肥：「 因為備戰金像獎要準備戰衣，所以我一個月之內減咗10磅 ，終於見到有條纖腰 ，連老公都被我激發到一齊減。之前要忙湊女冇咁多時間放喺工作上，而家個女開始返學啦，而且最近又轉咗新公司，所以希望有更多唔同嘅發展 。」
早前Rosa飛往台灣探望居於當地嘅媽咪，亦同經理人拜訪唔少電影人討論演出機會。Rosa去年因為《年少日記》揚威金馬獎而為大家熟悉，亦因為媽咪係台灣人早諳流利國、台語，所以希望有機會兩地同步發展。Rosa仲話稱瘦身之後想嘗試不同角色，動作片奸角亦好，準備好迎接唔同挑戰。
