一個好人｜好心人出手助解低沉困境 子善美儀揭低調好人好事

由 林子善 江美儀 擔任主持； 鄭子誠 聲音導航嘅全新綜藝節目《一個好人》聽日起首播，兩位主持會喺節目中深入了解來自唔同階層同背景嘅好人好事，體驗箇中可貴之處，同時帶出社會上被忽略嘅人與事。

江美儀同林子善主持嘅《一個好人》深入社區了解低調耕耘嘅好人好事

星期一晚播出嘅第一集，子善分別拜訪義務為流浪動物執屍嘅文哥，仲有年僅14歲就組織義工團嘅潘浠淳。

貨車司機文哥幫助往生動物有尊嚴地走過彩虹橋已有5、6年，除咗令出唔少心力同時間，火化動物費用亦令文哥欠下十多萬債務。子善跟隨文哥為貓咪屍體善後，事前更直言有啲驚，仲話：「如果有咩暈低，文哥你唔使理我。」

子善跟隨文哥了解佢為流浪動物處理遺體嘅原因

由於貓咪屍體位處陡峭山坡，子善跟文哥登山時不慎絆到幾乎仆低，幸最終有驚無險完成工作。之後佢再跟文哥將流浪狗屍體送往火化作最後道別。雖然文哥處理屍體時睇落輕描淡寫，其實只係努力壓抑傷痛，直到撳掣火化後先落下男兒淚，同樣感性嘅子善亦坦言撳掣一刻感覺可惜又感觸。

之後子善會合年僅14歲嘅浠淳到深水埗「洗樓」，向劏房人士派發物資，雖然抽到一袋二袋，不過浠淳完全冇呻攰，仲堅持逐家逐戶拍門送物資，非常有愛心，子善見狀亦不禁慚愧話：「一個14歲小朋友，有咁大勇氣同愛心，我呢個Uncle仲成日 話自己充滿愛同正能量，佢嘅層次好高。」

年僅14歲嘅浠淳為劏房戶基層嘅付出，令子善自愧不如浠淳更加同炎明熹一樣，係去年傑出青少年嘅得主

而後晚(19號)播出嘅第二集，子善分別拜訪義務幫助無家者嘅 江浩文(文仔)同充滿愛嘅寄養家庭龔家。曾經係無家者一份子嘅文仔，因為親身經歷過所以有深刻感受，講到一直致力為無家者服務，文仔話：「我成日都話唔想放棄佢哋，如果我放棄咗呢班無家者，就好似放棄咗當年嘅自己咁，我當佢哋係屋企人，幫得幾多得幾多！」

曾經係無家者嘅文仔，亦落力為仍無家可歸嘅朋友提供協助

同文仔相處過後，子善感觸咁話：「香港愈嚟愈多無家者，希望善心人幫助佢哋之餘，都要多啲關心佢哋，大家都出一份力就可以積少成多。」

之後子善又走訪寄養家庭龔家，龔家由 2011年開始接待第一個BB，到2024年已經先後照顧過合共32位可愛小寶寶。女主人 龔黃螢敏(Linda)曾經患過一場大病，逃出鬼門關之後，Linda 深悟活在當下嘅道理：「我都唔知自己仲有幾多日子，醫生冇講過我已經好返，唔會畀我停打標靶藥。如果咁樣，我不如用自己能力去做開心嘅事。」

龔黃螢敏因為一場大病，令佢同家人成為寄養家庭，將愛散播

之後Linda一家就成為寄養家庭，收養多位欠缺愛嘅小生命，生活亦從此亦變得不一樣，佢話：「當時接待第一個小朋友，正能量、愛心同歡笑係充斥咗成個屋企，係BB令到我哋龔家走出哀傷。」

身為一女之父嘅子善見狀亦相當感觸，眼濕濕話：「自從我個女出世之後，佢將我嘅眼光爆開咗，佢哋唔係一件貨物，佢係一個生命，點可以生咗佢出嚟，咁唔負責就抌低佢，喺我字典係唔容許。」

《一個好人》18號起、逢星期一至三晚 22:30 翡翠台