林心如預告正籌備新劇本 《華燈初上》第四季未見曙光

林心如 呢日化身Pink Lady出席一個慈善活動，狀態大勇嘅佢，完全唔似已經48歲。講到最近台灣發生震驚社會嘅虐殺兒童案，身為媽媽嘅心如都覺得好心痛，佢話自己屋企都有保姆，但都係自己嘅親戚，加上唔駛開工時，佢都會自己接送囡囡返學放學，同埋陪住佢，所以唔擔心。

心如又話自己一直都有教囡囡要學識保護自己，加上囡囡日漸長大，無論開心同唔開心，佢都會主動分享，所以相對嚟講，心如都話比較放心。

近日有消息指，佢嘅老公 霍建華 將會接拍由 劉若英 執導嘅台劇，同影后 謝盈萱 首度合作。不過呢日佢就未為老公證實呢個消息，只係話自己嚟緊會籌備一個新劇本，仲話題材都幾有趣，至於《華燈初上》第4季會唔會推出? 心如就話暫時未有曙光喇。