何超儀首回應賭王遺產分配安排 自認可協助胞姐打理家族生意

向來大膽敢言嘅 何超儀 ，最近接受內地名主持陳魯豫嘅節目《魯豫有約》訪問，當中首次大方回應關於已故賭王 何鴻燊 嘅遺產分配問題。
魯豫喺節目入面問到賭王遺產分配問題。
魯豫問到：「大家會好奇你會分到很多遺產嗎？」超儀坦言咁回答：「平均了。當然比為家裏工作的姐姐弟弟會才一點。」之後魯豫指遺產已經足夠超儀去追求自己嘅生活、喜好、音樂同電影時，超儀雖然點頭，但就笑言自己唔可以一年投資開拍多部電影。當魯豫指超儀點都會比普通演員有經濟實力，因為佢即使用晒啲錢，都會有家姐支持，對此超儀就搖搖頭話家姐真係會唔理自己：「餓不死我就可以了，她覺得，是我自己找來的。」
超儀首次回覆何鴻燊遺產分配問題。
身為二房細女嘅何超儀，有三個能力出眾嘅家姐同一個細佬，基本上何家嘅生意都由佢哋四個打理，而超儀反而冇插手家族生意，轉為喺娛樂圈發展。外界一直認為係超儀性格瀟脫唔想打理家族生意，但喺訪問入面佢就為自己平反，指自己亦想為家族事業出一分力。
超儀指自己都想為家庭生意出一分力。
佢話：「我是不明白為何到現在，他們還沒想像到，其實我也能成為她（指何超瓊）的團隊成員。」魯豫問到超儀係咪因為呢幾年嘅經濟，先令佢有為家族打理生意嘅想法？超儀就指當年家姐冇問過自己嘅想法：「她亦不知道我能做到甚麼，因為他們不留意我。」超儀話當年如果自己有問題想問大家，只要佢一開口，媽咪、阿姨、三個家姐都會話自己唔啱，所以超儀笑言縱使自己係愛佢哋，都只可以遠距離咁愛，唔可以靠太近呀。