TVB熱播劇《再見‧枕邊人》劇情緊湊，噚晚（20日）劇情講述志騫（劉宸熙飾）好友、Bosco（陳穎朗飾）因先天身體缺磷，患上XLH罕見病住院，因為一年醫藥費接近200萬，揹負巨額醫藥費嘅「單親媽媽」Coco（林秀怡飾）喺搵Bosco生父攞錢時，被「最強心機女公關」Rachel（張曦雯飾）攔截。最後Coco逼於無奈向鄰居、「流氓律師」金長勝（羅天宇飾）講出Bosco生父身份，就係財閥「大凌生」凌頌恆（張國強飾）。因此，Rachel指控Coco違反保密協議，金長勝亦決心要為Coco討回公道。
其實今次並唔係秀怡第一次飾演單親媽媽，佢喺2021年劇集《欺詐劇團》亦同樣係單親媽媽角色，但對比之下，秀怡就表示兩者有好大分別：「雖然都係單親媽咪，但係兩者嘅性格都好唔同。一個係好藝術家嘅人，一個係為生活馬死落地行，咩都要做嘅人。後者做嘅每一樣嘢都有個原因，而唯一嘅原因就係要搵錢，養大個小朋友，仲要有啲嘢令佢好似畀人偷咗人生咁。」
秀怡每次拍劇都會為角色落苦功，更會喺睇完成個劇本後細心分析每個角色嘅變化同可能性：「今次我做功課時有作一個故事畀Coco，等自己對人物設定再清晰啲。我仲有為Coco設計同唔同人相處時有咩唔同嘅演繹，所以其實Coco個性格同情緒好多變化。」而今次秀怡喺多場戲之中將母愛擔憂嘅情感演繹得入心入肺，由眼神、語氣、肢體語言多方面詮釋角色，令網民睇到都直呼虐心，大讚佢演技躍進不少。
秀怡亦讚劇本對白寫得感人，令佢容易入戲，甚至喊到收唔到聲：「排戲嘅時候讀到啲對白已經想喊，有一場生離死別嘅戲，我喊到收唔到聲，轉機位嗰陣都仲喊緊！」連現場演員都唔敢打擾佢啊。
《再見‧枕邊人》逢周一至五晚8點半播出