顏米羔捲入賄選疑雲急澄清 理解粉絲太愛自己而做錯事

TVB歌唱真人騷《中年好聲音2》將喺3月24號周日晚上舉行決賽，一眾參賽者努力備戰密鑼緊鼓作最後準備。比賽綜合評判及全球觀眾決定邊三強進入最終回合，觀眾仲有份選出「觀眾最愛好聲音大獎」，最後七強嘅後援會喺呢段時間為偶像拉票。

最近有位顏米羔支持者透過電話群組為偶像拉票時表示，只要投顏米羔一票就會送出按摩療程，因事件涉及不公平拉票，所以米羔得知事件後即刻發聲明澄清，表示已聯絡呢位支持者，要求對方馬上停止不公平拉票。

而呢日米羔返公司進行排舞時再談及此事，米羔就話認識嗰位熱情粉絲，明白對方只係太愛自己，所以勸說後對方有出貼文道歉。米羔指經一事長一智，自己上咗保貴一課，明白粉絲緊張自己，所以佢決定主動拉票先得，亦好感謝粉絲們對佢全力支持，呼籲未投票嘅朋友考慮投票畀佢！