秦煌日前喺酒店房內跌倒，據知係因走路乏力而跌倒，隨後被送往醫院，其後林偉受訪指好友秦煌目前留院，經檢查後見秦煌隻腳好腫、腳趾啲肉有啲爛，更一度未能聯絡秦煌子女，秦煌噚日受訪報平安，指自己現時情況已有好轉。
秦煌多年前長居深圳，近年喺青衣一間酒店獨居，因跌倒後要坐輪椅出入，好友林偉又透露秦煌已進行驗血檢查，醫生稱秦煌因唔夠血以致跌倒；秦煌向傳媒透露自己唔夠血，成日見頭暈，好少落樓食飯。
秦煌目前情況已有好轉，飲咗幾杯「鐵水」，雙腳開始回復力量，不過佢仍未可以落床行吓，暫時要用尿片，秦煌指除咗唔夠血，身體並冇異樣，由於入院進行一系列檢查，須24小時禁食，秦煌稱禁食後食到少少餅乾，已令佢笑逐顏開，估計留多兩日就可以出院。 
林偉曾呼籲秦煌子女去醫院探望爸爸 ，因為好多嘢需要家屬決定。秦煌稱子女已前往探望，大家有傾吓屋企嘢，秦煌曾剖白與四位子女關係疏離，一直以為給予物質就係做一個好爸爸，亦怕與子女修補關係徒然。據知秦煌多年前長居深圳，由相差30年嘅「知己」照顧，妻子莫佩雯曾6次提出離婚均被佢拒絕，有指秦煌跟子女關係疏離，睇嚟親情關係有望好轉。