金秀賢新劇挑戰入贅人夫角色 金智媛被封「體貼女王」面紅

金秀賢相隔3年終於又有新劇，呢日佢聯同金智媛、朴成焄、郭東延同李主儐等現身新劇記招，呢個陣容上演愛情喜劇，單係顏值都已經爆燈。今次仲係金秀賢11年後再次同《來自星星的你》嘅編劇朴智恩合作。

金秀賢話自己第一次演人夫角色，自己都好想挑戰呢個入贅嘅角色，因為呢個人物有好多唔同嘅魅力，有細心嘅部分、亦有聰明嘅時候，但有時又會好雞婆，所以自己好想有趣地將呢啲面向都演繹出嚟。

新劇中金智媛演財閥女強人，同佢以前演過《繼承者們》嘅角色有啲相似，佢就話想隔11年仲可以同代表作相提並論，絕對係對自己嘅挑戰呀。而喺記者會上金秀賢同金智媛就互笠高帽，先係金秀賢讚金智媛相當體貼，喺片場有「體貼女王」之稱，搞到金智媛面都紅晒，之後金智媛就讚金秀賢體力好好，而且經常會喺片場帶歡樂畀大家呀。