一個好人｜林子善舉辦相展凝聚愛 幸有「好人」為社會送暖意

由 林子善 江美儀 主持嘅綜藝節目《一個好人》，今晚播出第6集。呢集子善分別拜訪「廟街神父」胡頌恆、寵物暫託家庭Christy仲有攝影義工何偉彤偉哥。
 
「廟街神父」胡頌恆係一位77歲嘅澳洲人，來港40年嘅佢講得一口流利廣東話，而住喺100呎劏房嘅胡神父，就喺廟街開設咗一間只聘請更生人士嘅社區食堂。胡神父覺得：「因為呢啲人好難搵工作，唔係好多人請佢哋，但佢哋其實好勤力，喺度做嘢好開心。」面對製作組自己係咪一個好人時，胡神父就好謙咁講：「我唔係好人，我做呢件事係應該嘅，以前好多人對我咁好、畀機會我，我好幸福，我都想對其他人好！」

節目為觀眾繼續分享香港唔同好人嘅不凡故事
 
至於做咗寵物暫託家庭４年嘅Christy，一共照顧過13隻有傷殘或健康有問題嘅狗狗。Christy亦喺寵物暫託呢件事上得到寄託同成功感，希望可以幫毛孩重新適應屋企嘅生活，同埋提高佢哋被領養嘅機會。另一邊廂，子善會同74歲嘅攝影義工偉哥為一名96歲婆婆影靚相，過程溫馨歡樂，偉哥仲會分享為臨終長者影遺照嘅感人經歷。

節目拍攝時為大家留影，子善特別安排一個相展感激大家嘅付出
 
節目尾聲有一個特別環節，子善同一班「好人」接觸時影低唔少靚相，子善更特意舉行一場相展，邀請過往幾集介紹過嘅「好人」聚首，又亦分享拍攝節目感受，佢認為：「呢個節目令我發現呢個世界有時好苦，但慶幸有一班好人默默付出，為呢個社會送上一點甜。」而子善更希望透過相展將咁多位好人連繫埋一齊，大家互相認識交流，相信可以變成更強大嘅力量去幫助呢個世界。

《一個好人》星期一至三晚 22:30 翡翠台