梁思浩主持全新靈異直播節目 設報驚熱線為觀眾解決陰陽疑難

梁思浩 早前為TVB主持一連兩輯《通靈之王》廣受歡迎，稍後觀眾又會見到思浩主持新節目，今次佢將會夥拍 黃紫恩 黃耀英 擔任主持，拍攝以靈異直播為賣點嘅新節目，仲請來一班玄學大師、殯葬業同廟宇界嘅翹楚組成顧問團，分享業界嘅奇聞異事。 

思浩早前嘅新節目邀請咗大批嘉賓一齊討論內容方向

早前思浩同製作團隊喺電視城為節目開會，出席嘅顧問團包括︰「警界天師」簡信回、奇門遁甲師傅張芯熏、玄學家周亦謙、玄學家周漢明、風水師皓云師傅、六壬師傅陳法齊、狐仙堂林千博師傅、占卜師羅泳嫻，仲有一班殯葬業同廟宇界嘅資深人士。

當日討論話題廣泛，由靈異事件、古怪殯葬儀式都有提及，包括流傳多年嘅性交轉運係咪真係有效、兇宅係咪可以買等話題已經夠吸引。當日張芯熏師傅又即場分享塘西(西環)風月場所嘅古老習俗，話說當年妓寨琵琶仔(雛妓)賣完初夜後，會即時為恩客「帶孝」以示「喪夫」，方便升呢成為「老舉」接客，恩客仲可獲得一封利是作為意頭，聽落非常有趣。

繼《靈靈之王》之後，思浩今次會同黃紫恩仲有黃耀英一齊主持全新直播節目

節目另一賣點係邀請一班久未露面嘅藝人、名人分享靈異經歷，為增加同觀眾互動，設有「報驚熱線」同「靈異爆片爆相」，歡迎報料提供奇異經歷，還有「互動熱線」可以即時表達意見，令觀眾可以參與其中，更有機會贏得由各師傅開光加持嘅平安符。

仲話節目要成為打通陰陽之間嘅「東張」喎

思浩近日忙於為節目搜集資料做準備，非常期待節目登場，佢話︰「TVB好耐都冇一小時嘅全直播節目，今次挑戰好大。最好玩係可以同觀眾互動，透過佢哋嘅報料、提供嘅相片，同觀眾近距離接觸。」而思浩仲有一大心願，就係替觀眾處理「奇難雜症」，他豪言：「想透過節目幫香港市民，解決一啲正常途徑解決唔到嘅問題，堪稱穿梭陰陽界版嘅《東張西望》。」

Jojo首次參與靈異節目，最大準備係吃飽、瞓飽，並笑稱：「因為直播節目由下晝開始，一直拍到凌晨，要儲足精神返工。」難得有機會同思浩合作，會乘機偷師學習。