彭美施新編粵劇創新境界 多位名人捧場激讚精彩

由彭美施（施姐）擔任出品人暨總策劃嘅一連六場新編粵劇《白蛇‧許仙情越千年》日前隆重開鑼。呢次施姐一手策劃新編粵劇，無論內容、布景、視覺效果、唱做唸打、武場、服裝都盡見斥資製作，更破天荒起用三對文武生與花旦飾演許仙與白娘娘，每對組合演出兩場，而首演（26號）就有文武生李秋元與花旦梁燕飛打頭陣。

新編粵劇《白蛇‧許仙情越千年》近日開鑼
 
喺首場演出中，演員武功打得亮麗，尤其「人體詮釋」科技，令觀眾睇到台上嘅白娘娘由人身變白蛇，又如《盗仙草》一幕梁燕飛武藝超卓，加上飾演青蛇嘅曉瑜武出色，以及一班武師喺《水漫金山》精彩連場對打招式俐落，觀眾一直拍手叫好。

班主施姐帶領一眾演員於台上感謝觀眾支持
 
而特邀演出嘅宋洪波飾演韋馱，出場非常威武，聯同為今次特別剃頭演法海嘅符樹旺，都令觀眾印象深刻。除咗武打之外，白娘娘同許仙《斷橋》一段情深剖白，唱出哀怨情深，令觀眾對許仙改觀，而最後一幕《情越千年》，最令觀眾意想不到係結局喺保留傳統之下，再增添無窮突破創意，令觀眾拍爛手掌，大叫好睇！而專程捧場嘅沙姐林建明、賈思樂、廖安麗、錢小豪、馬寶顓等大讚施姐作品令佢地重新定義粵劇絕冇悶場，只有耳目一新嘅精彩。
 
一眾台前幕後謝幕時施姐在台上表示 : 「因為係首場演出，仲有好多可以改善地方，希望往後五場演出可以做到精益求精 ! 」同時亦多謝台前幕後百分百投入，先可以達到超水準演出。