黎明詩病逝丨何婉盈陪伴黎明詩抗癌路 莫鎮賢讚故友身患重病仍對前夫有情有義

黎明詩喺3月28號上午不敵病魔離世，終年58歲。黎明詩生前人緣甚好，不少好友收到噩耗都傷心不已。好友何婉盈（laine）同莫鎮賢接受TVB娛樂新聞台電話訪問憶述故友，Elaine一直有同黎明詩聯絡，佢話故友大半年前開始抗癌之路，近期有去醫院探望。

Elaine透露黎明詩一直抱住正面態度抗癌，可惜癌細胞擴散令病情起變化，此時Elaine難忍傷痛哽咽話：「身為近啲嘅朋友就知道，臨走前呢兩日已經冇乜痛苦。」Elaine呢幾日需要回內地工作，臨飛前有到醫院探望黎明詩，當時仍然可以對答傾偈。

講到最後一次合作，Elaine指喺2019年佢哋同文佩玲、黃寶欣、胡渭康等一齊開騷，嗰次一班人一齊排練、做宣傳，成個過程玩得好開心，加上黎明詩係一位開心果，成日帶畀大家歡樂；Elaine亦指因《流行經典50年》後，佢哋之間嘅關係越嚟越熟。

莫鎮賢則稱據佢所知，黎明詩初初係患上食道癌，已經病咗一段時間，曾經有好轉過，後來開始行唔到。佢話黎明詩係一個好硬撐嘅人，一直唔肯坐輪椅，每次由身邊人扶住佢行去覆診同接受治療。

莫鎮賢稱自己係好後期先知，可能黎明詩或者身邊嘅人唔想畀佢知，而自己同黎明詩最後聯絡都係透過電話。近幾日開始踏入倒數時間，所有朋友趕去醫院探望，莫鎮賢喺內地趕返港，但探望嘅時候，黎明詩已處於昏迷狀態。今朝（28號）離世時，黎明詩係嘴角笑住安詳無痛苦離開。

莫鎮賢指舊年10月至11月左右灌錄新歌，當時同黎明詩傾電話，對方話可以做MV嘅女主角。之後黎明詩仲好精神奕奕嚟開工拍攝，莫鎮賢仲話喺今年一齊慶祝生日時，就一齊欣賞MV，冇諗到就變成佢嘅遺作。

問到有冇聯絡黎明詩嘅前夫同密友Kelly，莫鎮賢話其實一直係由Kelly照顧住黎明詩，跟住佢又喊住話喺黎明詩患病期間，其前夫身體都出現問題，當知道前夫未有家人照顧時，即使當時黎明詩身患重病，仍然堅持照顧前夫，所以黎明詩係一個有情有義嘅人。