《新蜀山劍俠》4K修復版公映 元彪憶當年憾世代轉變

元彪 呢日同 錢嘉樂 龐景峰 等藝人，為經過4K數碼修復嘅經典電影《新蜀山劍俠》首映擔任嘉賓，當年有份主演嘅元彪仲回憶指，當年拍攝電影因為未有現代技術，相信比今時今日可以話辛苦50倍，因為所有動作都要由演員親身上陣呀。

佢又指當年同成龍仍係武師年代時，由2樓跳落地面再打一大輪可話易過借火，不過隨住時代改變，佢認為市場已經唔同，演員嘅演技同形象更為重要。

近年主力擔任幕後工作嘅佢，被問到會唔會有機會同洪金寶、成龍等「七小福」師兄弟拍攝新作時，就笑言應該「冇乜人睇」，但係有機會就一定奉陪齊齊演出咁話喇。

而入行已經40年嘅嘉樂，就話當年就係因為元彪邀請而成為洪家班成員，仲話對方早已係自己偶像，而一加入就已轉瞬參與《快餐車》拍攝，仲話元彪一直為大家發展指點呀。而近年成為新一輩動作演員嘅龐景峰，就話因為家庭原因自細已經對特技動作人員非常敬佩﹐仲話因為科技發展對行業仲更有保障呀。