一個好人丨江美儀探訪獨居嘅老友記感觸大勇闖蝨屋為基層家庭滅床蝨

為觀眾介紹社會上好人好事嘅節目《一個好人》嚟到最後三集，4月1號晚播出嘅一集，由江美儀擔任主持，佢分別拜訪義務幫基層滅蝨嘅陳家駱(阿臣)、義補計劃創辦人梁啟業(O 仔)，同埋義務照顧獨居老人嘅徐玉英(Joyce)。
主持江美儀上線。
因為自己曾經受床蝨煎熬，所以阿臣成立咗滅蟲公司後，就決意義務幫基層滅蝨，阿臣話：「個人力量好細，做得一單得一單，幫到一個人就一個人，希望能夠及時將關懷帶到出去。」
美儀出動滅蝨。
戴齊口罩、手套嘅美儀，跟阿臣去到一個布滿雜物、床蝨無處不在嘅單位滅蝨。唔好睇美儀膽粗粗拎住蒸氣機四處噴蒸氣滅蝨，當佢見到床蝨隱藏喺各種窿窿隙隙時，都仲忍唔住嚇到大嗌，事後美儀坦言：「一定要唔怕污糟，如果唔係點清潔，但我回心諗，如果我唔幫佢清潔，咁佢咪一直畀啲蝨惹佢？係恐怖、核突㗎，但做得就做囉。」見美儀皺晒眉頭就知幾可怕啦！事後美儀話勁驚。
義補計劃創辦人O仔除咗召集一班大專生幫助基層小朋友補習外，仲會定期舉辦各種活動，為佢哋擴闊生活圈子。而拍攝當日美儀化身「一日講師」，為學生們分享人生經歷，勉勵佢哋勇敢面對得失。之後美儀會合退休護士Joyce 出動探訪獨居嘅老友記，過程中佢大有感觸：「活到呢個年紀，身邊總有啲人離開咗，我開始覺得係咪要用多啲時間去陪伴身邊嘅長輩，唔想到時有遺憾。」
美儀化身「一日講師」。
而2號晚播出一集，美儀分別拜訪成立運動義教平台嘅Owen、義載司機吉哥、樓梯機操作員 Peonie同埋家居維修義工邱師傅。14 歲嘅Owen年紀輕輕就創立咗運動義教平台，組織一班同輩好友義教基層小朋友做運動，美儀跟佢去到幼稚園教小朋友打籃球，Owen教小朋友時有板有眼，完全唔似一個14 歲嘅男生，最後一班幼稚園小朋友為Owen送上感謝狀同唱歌作為答謝。事後美儀大讚Owen好有領導才能：「小朋友帶領住義工去做嘢真係唔容易，十幾歲嘅小朋友都有咁嘅心去幫其他人，我哋係咪要向佢哋學習做多啲嘢回饋社會？」
14 歲嘅Owen年紀輕輕就創立咗運動義教平台。
之後美儀就同義載司機吉哥接送一對因丈夫坐輪椅而久未外出嘅夫婦去山頂遊玩，吉哥坦言見到對方玩得開心，自己都會快樂。吉哥又分享自己最難忘嘅經歷，佢話曾接過一位伯伯外出影四代同堂全家福，雖然影完冇耐伯伯就離世，但對方嘅家人仍然非常感激吉哥幫忙。跟住美儀又同Peonie學習操作樓梯機幫助輪椅人士出行，由於樓梯機相當重，大家都做到身水身汗。