星光路上完整版丨王敏奕曾懷疑自己唔啱做演員 被經理人戲稱要酒後先識笑

由大銀幕走到公仔箱，王敏奕喺劇集《婚後事》中一改純情形象，破格演出誘惑力十足嘅角色，令觀眾眼前一亮。呢日王敏奕就嚟到 TVB娛樂新聞台節目《星光路上》，同主播 潘盈慧 講下自己演藝路上嘅經歷。


相信每個演員都會經歷過低潮期，演員無戲開，然後陷入自我懷疑，懷疑自己做得唔夠好而冇戲拍、係咪唔適合做呢行等等。以上情況同樣喺王敏奕身上都有發生過，佢話曾經試過因為民啲自我懷疑，令經理人喺出活動前同佢講：「不如你飲返兩杯先出去啦，如果唔係你又唔講嘢、又怕羞。」甚至要經理人喺台下提佢要笑多啲，不過經歷完呢啲低潮同自己懷疑後，王敏奕話而家情況已經好好多。

講到由電影轉身入TVB嘅契機，王敏奕指當年自己啱啱喺紐約返港，喺仲有時差、呆呆滯滯嘅情況下去咗《女人俱樂部》嘅海選，最後被李麗珍選中，就係咗就拍咗第一部TVB嘅劇集。之後喺《香港愛情故事》入面挑戰型格角色，王敏奕話呢個角色完全係自己想像中嘅自己，因為呢種有啲反叛、識保護自己、識say no嘅性格令佢覺得好有型。

王敏奕喺《婚後事》入面要誘惑羅子溢，原來佢兩個喺Y2K年代已經有合作過，王敏奕話當年自己14歲仲係箍緊牙，估唔到咁多年後會再合作。至於講到未來係咪會繼續揀啲好有挑戰性嘅角色嚟演？王敏奕就話自己冇好刻意咁揀，反而而家會提醒自己做演員唔係為任何人，能夠做到一份自己咁鍾意嘅工作已經好感恩，所以唔會認太多，順住去就OK。