與邱鋒澤新歌MV九日破62萬點擊 艾薇9度下拍攝凍到膝頭發紅

陳零九同邱鋒澤嘅「九澤CP」早前宣布4月會嚟香港舉行巡迴演唱會，令一眾九澤期待不已。而為咗加深樂迷嘅期待感，邱鋒澤日前發佈同蕭敬騰師妹艾薇合唱嘅全新單曲《一起寂寞》，首歌上架9日就已經有超過62萬點擊！
新歌MV上架9日就有超過 62萬點擊。
新歌以「世界再慌亂，只要有您也不寂寞」為主題，正正配合嚟自新加坡嘅邱鋒澤，同埋嚟自馬來西亞嘅艾薇，離鄉別井去到台灣發展嘅心聲。邱鋒澤直言離開家鄉嘅親友去追夢，難免會有寂寞嘅時候：「但是當你知道，這條路上有人跟你一起打拼，便不會感到那麼寂寞了。」而艾薇亦表示：「那時候聊到歌詞的方向時，我們就聊到大家都是從異鄉來台灣打拼，對我來說鋒澤哥是很好的前輩，對於在外打拼也很有共鳴，因此想延伸這個概念到歌詞裡。」邱鋒澤指去外地工作並唔係新鮮事，所以都想借新歌為各地嘅樂迷打氣，話畀大家知你並不孤單。
艾薇笑言演技對佢嚟講係一大挑戰。
至於講到新歌MV以全劇情形式嚟拍攝，邱鋒澤話：「以往拍攝都是對嘴為主，這次想給大家一些驚喜，嘗試以往沒做過的挑戰，以全劇情的方式直接表達歌曲概念。」而首次拍攝全劇情MV嘅艾薇，笑言對佢嚟講演技係一大挑戰：「拍攝的時候其實有點緊張，開拍前我不斷在家練習演技與表情，是很有趣又好玩的體驗。拍攝當天剛好遇上寒流，氣溫只有9度，但我的造型就只是鬆寬的衛衣與短褲，身上貼了5個暖包，但膝蓋依然凍到發紅，幸好拍攝過程很順利，我還很享受這次的合作。」

對於呢次同艾薇合作，邱鋒澤話玩得相當開心，仲話如果再有機會的話，希望可以同對方挑戰抒情歌曲。

邱鋒澤話下次想同艾薇挑戰抒情歌。