雲浩影海邊拍專輯封面水中跳舞 自然演出仙氣湧出嚟

日前推出第二張個人專輯嘅 雲浩影（Cloud）早前為新專輯拍攝封面同相集，仲邀請導演 麥曦茵 同團隊製作，齊齊到平靜嘅長洲取景。

Cloud嘅新專輯封面同相集由麥曦恩導演嘅團隊操刀

Cloud呢日分別以黑色西裝同白色紗裙拍攝，被海水沾濕裙擺嘅佢仲索性除鞋赤腳，又拎起裙擺喺水中轉圈跳舞，興奮猶如小朋友一樣，Cloud話：「今次影Cover都幾艱辛，攀山涉水去到長洲。見到有個咁靚嘅陽光與海灘，順便落埋去Let’s Get Wet，啲衫濕晒。」

除咗去海灘之外，佢哋亦到一間小屋取景拍攝

專輯靚相由麥曦茵導演操刀，Cloud仲話對方捕捉到自己最自然一面：「佢覺得我自然嘅狀態係最舒服、最吸引到人。我比較易做到，所以成個拍攝過程比較隨意同埋自然。」團隊之後蠹往小屋內拍攝，Cloud換上多個隨性造型，又以唔同道具表達「痛」。

Cloud話希望新專輯同大家分享同痛嘅相處

佢話：「好希望用畫面呈現『痛』，所以會有啲特別嘅Concept。譬如會有橡筋箍耐咗嘅勒痕，我背脊都會有花嘅倒影，希望呢啲傷痕會變成燦爛美好嘅事情。」專輯命名為《INTRODUCTION to PAIN》，不過「痛」對Clou就係重要課題，佢話：「第一次感受成年人世界嘅痛係點，能夠學識面對自己嘅痛先係一種成長，有經歷嘅人先至美麗。我想同大家分享經歷，亦想大家陪我經歷呢件事。」