《屍殺列車》導演執導全新漫改劇集 李貞賢產後急急操fit投入拍攝

韓國經典電影《屍殺列車》嘅導演延尚昊身兼編劇同導演嘅新劇推出，令人非常期待，延尚昊今次改編日本著名漫畫《寄生獸》，呢日舉行記招，主演具教煥、李貞賢同全少妮現身造勢，李貞賢曾經同導演合作《屍殺列車2》，收到導演嘅邀請，就算當時生完B得三個月，都要急急操fit自己投入拍攝，李貞賢話自己喺戲中用嘅長槍好重，有成5KG，對於本身手臂冇肌肉嘅佢係一大挑戰，所以自己拍攝前好努力舉啞鈴健身，結果拍拍下真係覺得長槍越來越輕添。

而劇中另一位女將全少妮，要演繹同怪獸共存嘅人類，動作同肢體型態上都非常有難度，作為新人嘅佢自爆拍攝時真係幾徬徨，好彩有導演同武術指導從旁教導，而喺拍攝過程中佢體會到原來身為一個動作演員，信心非常重要，所以一定要有足夠嘅信心先可以完成動作。