台灣強烈地震各藝人報平安 柯震東心愛figure五體投地

今日清晨7點58分，台灣花蓮發生黎克特制7.2級強烈地震，全台灣都感受到天搖地動，就連香港都有市民話感受到明顯嘅搖晃。地震當時身處台灣嘅 蘇麗珊 ，透過語音訊息描述地震當時嘅情況。佢表示地震時仲瞓緊覺，自己被搖醒，起身時都唔知發生咩事，只係見到物件一直搖動，佢話而家租住嘅單位，係同一位台灣媽媽共住，喺危急關頭，大家攬住一齊度過地震可怕嘅一刻。

蘇麗珊話嗰刻自己都好驚，見到物件喺度搖晃、花樽又跌咗落嚟，加上自己又住喺較高樓層，搖晃幅度更大，而家好彩有驚無險，佢話都希望大家可以平平安安。

至於老家位於花蓮嘅 余思霆 ，雖然並非身處台灣，但佢都有喺社交平台上載家中受損情況，睇落真係觸目驚心，思霆話一知道地震時非常緊張，即刻打聽家人同朋友嘅安全，好彩大家都無事，只係家中有啲櫃同埋牆裂開。

地震過後唔少藝人都喺網上報平安，包括周杰倫就寫道「晃到不行 平安」而太太昆凌就寫道「希望大家平安」。咁啱返咗台灣嘅 楊丞琳 ，就話驚到唔敢再瞓覺，連去媽咪屋企嘅勇氣都無，而小S、炎亞綸、林心如等都有第一時間問候大家。大馬女神林明禎亦都留言「天佑台灣」。

 而 柯震東 亦喺社交平台Post出屋企珍藏嘅1：1心愛嘅figure，全部五體投地，佢更寫道：「再見了﹗各位」，而柯爸爸柯耀宗家中珍藏藝術品亦一樣碎落一地，據知柯爸爸損毁嘅收藏品價值高達8千萬台幣，真係見到都肉赤呀。

受到地震影響嘅唔止身處台灣嘅藝人，好似蘇皓兒3號朝早由香港搭飛機往沖繩，但受到地震影響，沖繩發布海嘯警報，那霸機場關閉，所以蘇皓兒都被逼原機返港。
而日本天后MISIA原定4號喺台灣舉行演唱會，亦因為地震而取消，MISIA話為保障歌迷同工作人員安全，決定取消演唱會，並承諾會再到台灣開騷。