胡美貽（Nicole）近日傳出有新戀情，據知佢哋已拍拖6個月，胡美貽更因喺花園打卡疑意外令戀情曝光。胡美貽今年3月慶祝30歲生日，更邀請多位好友去男友豪宅開派對，新歡豪宅係九龍塘一個價值4億獨立屋，胡美貽被爆已獲未來奶奶認可。
胡美貽於2020年曾承認與富二代Reeve拍拖，男方擁有億萬身家，可惜二人拍拖一年分手收場，單身咗一段時間嘅胡美貽早排邀一班圈中好姊妹廖慧儀、陳若思及黃嘉雯等出席生日派對，場地就喺一個九龍塘豪宅嘅大宅花園舉行，跟謝玲玲早前喺社交平台分享嘅家中環境極為相似。
恰巧其社交平台獲「未來奶奶」謝玲玲及「未來姑仔」林心兒follow，胡美貽似乎已獲男家開綠燈，成功融入家中！日前有報道爆料指胡美貽已進駐新男朋友6千呎豪宅，而新男友原本係同媽咪同住，胡美貽亦努力行未來奶奶政策，為嫁入豪門作準備。
胡美貽參加選美入行，據知其家境富裕，胡父係喺美國經商、母親則係醫生，胡美貽於2015年修畢商業經濟學系學士，之後佢獲父親資助100萬喺美國創業，胡美貽近年與友人喺馬來西亞以700幾萬買咗一幅30畝榴槤地，胡美貽最近經常返美國兼四圍周遊列國，曾自拍坐私人飛機。
