雲浩影新專輯紀錄成長的痛 相集造型喻意生命中傷痕

雲浩影日前推出第二張個人專輯，新碟設計花盡心思，封面同相集就去到長洲取景，Cloud形容過程係攀山涉水，當中更喺沙灘走落水拍攝水中跳舞畫面，Cloud話導演麥曦茵覺得佢嘅自然狀態係最舒服，最吸引到人，亦係佢比較易做到，所以成個拍攝過程都比較隨意同自然。

新專輯嘅歌曲係紀錄咗Cloud成長後經歷嘅痛，佢話對於自己嚟講係重要課題而當中有三首歌係佢現實中痛嘅經歷，但事前冇諗過要做三步曲，純粹係紀錄自己嘅事。佢又提到除咗喺沙灘取景，拍攝團隊又移師到一個精美小屋內拍攝，影咗好多唔同造型嘅相：「好希望用畫面呈現『痛』，所以會有啲特別嘅Concept。譬如會有橡筋箍耐咗嘅勒痕，我背脊都會有花嘅倒影，希望呢啲傷痕會變成燦爛美好嘅事情。」雖然專輯紀錄Cloud嘅痛，但係佢覺得完全沉重:「第一次感受成年人世界嘅痛係點，能夠學識面對自己嘅痛先係一種成長，有經歷嘅人先至美麗。」