由阮兆祥、李思捷、王祖藍主持香港首個扮嘢真人Show《福祿壽訓練學院》，逢周日晚上八點半推出。 明晚（7日）播出第二集為終極海選，Professor Fuk（阮兆祥）、Professor Luk（王祖藍）及Professor Sau（李思捷）將獲得機會對現時擁有8名隊員進行洗牌！
「洗牌」過程及方法係餘下26名參賽者（共25個表演單位）將釋數出場，三位導師若覺得呢輪表演者啱心水，即時按下眼前嘅搶人掣，若有多於一名導師搶同一位表演者，該表演者將獲主導權選擇加入邊位導師嘅團隊；如冇導師撳掣，該名參賽者將會被自動淘汰。由於每名導師隊伍上限均為8人，故當有新隊員加入，導師即場選擇需要被淘汰隊員。是集導師們嘅形勢亦會出現逆轉，上集「黑仔王」李思捷將「絕地反擊」、成功吸引大批實力新血爭相爭入隊，至於上集盡攬「顏值系」參賽者嘅祖藍，今集喺搶人期間食盡檸檬，由「顏值王」慘變「檸檬王」。
是集25個表演單位同樣有齊藝人及素人代表，分別（排名不分先後）為「元朗劉華」、「廣州暴龍哥」、「鬚根吳君如」、「行走的CD機」、「買一送一」、「變聲歌神」、「葵涌阿Rain」、「張繼馬利」、「古巨軒」、「一人Avantgardey」、「一人扮嘢之境」、「中山曾比特」、「球王B朗」、「友台藝人」、「光B女」、「大埔扮嘢王」、「長洲喜劇王」、「鴨脷洲霑叔」、「收縮舞王」、「人肉變聲器」、「鬼王菀之」、「澳門萬朱莎華」、「王祖藍必選」、「四捨五入王祖藍」及「HK. Mr. Bean」。
喺25個表演單位中，共有三個單位獲得「三燈」殊榮，而三位導師為咗爭贏心頭好，更各出奇謀氹參賽者入隊，當中有一名屬於「變聲系」精英嘅「三燈」參賽者表演完畢後，令祖藍大嘆自愧不如，就連「模仿達人」思捷亦甘拜下風：「不如咁啦，你做我哋導師好冇呀？」期待度爆燈。
「變聲系」、「顏值系」代表「火紅透視王菀之」及早前已曝光扮演「光B女」關嘉敏，與「影視系」代表「《獵鷹》版劉德華」、「鬚根吳君如」及「誇張眼淚系萬朱莎華」。另外《全城一叮》總冠軍之一孖八（李俊華）以舞蹈融合「收縮水」經典場口上陣表演，最終可唔可以再度跳出彩虹？
相比第一集，今集有兩個超乎想像嘅大龍鳳演出，分別為代號「一人Avantgardey」黃建東，及「買一送一」吳兆麟（Alan）及劉倬昕（Sam Lau）。先說「一人Avantgardey」，顧名思義，黃建東係一人分飾日本超人氣舞蹈團體Avantgardey，跳唱陳慧嫻經典跳唱歌曲《跳舞街》。黃建東誇張表情神倒模Avantgardey，連搞怪跳舞動作亦學到十足十！為咗加強表演效果，黃建東自製「隊員影片」伴舞，令效果似有19個黃建東一齊跳唱，有創意之餘亦係誠意十足。
談到是次演出，東東坦言碌盡人情卡，籌備時間更長達一個多月，東東又指為咗精益求精，完成綵排後當晚返屋企反覆練習同調整咗足足4個鐘，東東續指單係置裝過程已歷盡艱辛，更數度被誤當「變態佬」，去旺角同九龍城啲校服店被店員趕走，上網訂又搵唔到紫色，最尾佢係搵朋友再託人幫手整，件衫用咗四位數字！
另一超乎想像的演出係Alan及Sam Lau「買一送一」，二人扮Barbie仲大玩《超級變變變》式「人肉籃球」；表演期間化身「人肉籃球」嘅Sam Lau配合Alan動作不停一邊閃避、一邊狂做push up予以配合，令觀眾睇落真係似Alan打緊籃球。Sam Lau表現出體力、臂力及腰力驚為天人，表演中展示一身結實肌肉亦令人眼前一亮。
翻查資料，31期藝員訓練班嘅Sam Lau、自畢業後不乏演出及綜藝節目主持機會，曾被媒體封為「文武雙全」，就讀拔萃女書院，8歲已開始接受田徑訓練，中三加入港隊成為田徑運動員，專長係400米短跑。Sam Lau學業成績亦相當彪炳，以 DSE Best 5 29分成績考入香港大學文學院以一級榮譽畢業，目前喺香港大學修讀犯罪學碩士，於今年七月畢業。Sam Lau受訪時笑言與Alan因為志趣相投所以組 隊參加比賽，談到一身健碩肌肉，Sam Lau笑指自己每日凌晨會做Gym，而觀乎其社交網的做Gym實錄，一雙麒麟臂相當壯觀。
《福祿壽訓練學院》逢周日晚八點半翡翠台播映