粉絲為搶票露宿排隊一肚氣 IU台北開騷以中文冧番粉絲

韓國人氣歌手 IU 相隔5年再到台北開兩場演唱會，人未到經已掀起熱話，有唔少粉絲為咗搶買加開區域嘅門票，自2號起就不惜露宿72小時，中間又因為派籌安排引起唔少混亂狀況，搞到粉絲嬲嬲豬。

到4月7號第2場開騷前夕，大會再開售視線不良嘅區域位置，唔少粉絲把握最後機會搶飛，當中有粉絲喺排隊期間出現口角糾紛要報警求助，警方到場了解情況後，喺中午12:30開始清場，大約50名幸運嘅粉絲成功排籌入內購票，事件亦告一段落。

IU近日於台北舉行兩場演出

IU嘅演唱會雖然騷前發生小插曲，但係喺4月6號晚嘅首場舉行相當順利，仲吸引到 柯震東 朝聖，佢唔止喺網上發文興奮話：「我的心正在為IU而震動。」而大會嘅屏幕同網友亦野生捕獲到柯震東嘅身影。

柯震東原來亦係IU嘅Fans，現場仲被捕獲合照

IU嘅台北演出唱咗多首經典歌曲好似《BBIBBI》、《Celebrity》、《Love Poem》等，又努力練中文﹐開場連講三分鐘多謝大家同向粉絲們示愛：「離上次見面這麼快過了5年了，很想念大家！」佢亦獻唱咗告五人嘅歌曲《唯一》俾台灣歌迷聽，作為台北場限定歌曲。

除咗為台北站觀眾獻唱告五人嘅歌曲《唯一》，禮物亦有特別安排

為咗多謝台灣歌粉嘅熱情支持IU特地準備咗兩萬多份禮物送俾入場嘅朋友，獲得台北場專屬嘅小卡同鎖匙扣，取代韓國場嘅座墊，IU亦用中文介紹呢份禮物：「韓國場送大家座墊，因為座墊體積太大，所以這次準備了這個，雖然不是很重要，聽說成本不比座墊便宜，請大家記得帶回家。」

IU嘅台北站巡唱全場爆滿

IU演唱會坐墊其實早已成為佢開騷嘅固定傳統，故仔要講返2018年IU嘅出道10周年演唱會，因為當時係冬季關係，IU擔心粉絲坐到凍，所以自掏腰包為現場3800位歌準備坐墊，之後就變成IU演唱會嘅指定動作。而今年IU嘅巡演亦依慣例有坐墊，仲有好多顏色添，不過台北場嘅紀念品換成另外嘅限定禮物，唔知會唔會令粉絲失望呢?

現場亦以中、英、韓三語向地震死難者致哀

暖心嘅IU亦喺演唱會尾段以中英韓三個語言嘅文字，表達對日前花蓮強烈地震遇難者同向家屬表達深切嘅衰悼同慰問，同時為呢次地震全力以赴善後嘅工作人員致以感謝同支持。