鄧兆尊激罕攜三太陳妙慧受訪 分享靈異經歷曾見祥哥祥嫂

鄧兆尊日前罕有同三太陳妙慧(Nana) 到潘紹聰主持嘅電台節目分享靈異經歷，呢次係Nana首度接受訪問。
鄧兆尊應邀到潘紹聰主持嘅電台節目做嘉賓。
早前黃夏蕙喺同一個節目中，曾透露喺已故影星傅聲嘅舊居入面，見到疑似祥嫂嘅靈體。兆尊喺節目入面亦承認傅聲舊居現時係屬於鄧氏旗下物業，但佢就話覺得祥嫂應該唔會去嗰度，指夏蕙姨只係睹物思人，兆尊指該住宅現時丟空，但自己間中都會去睇下有冇嘢損壞。
左起：潘紹聰、陳妙慧、鄧兆尊。
節目入面Nana亦首次開腔講自己嘅經歷同異能。兆尊指有一年嘅七月十四，太太突然被鬼上身變咗男聲，眼珠亦只剩眼白，講嘅係東北話。當時兆尊同靈體「講數」，後來先知呢個靈體跟咗太太好多年，後尾兆尊應承幫佢超渡，太太先醒返。但自此之後，三太就多咗特異功能同法力，話好多仙家會寄居喺佢身體內，目的係想佢幫助超渡亡靈。
三太陳妙慧Nana首次開腔講自己嘅經歷同異能。
潘紹聰問到三太有冇見過祥哥祥嫂？三太話：「我唔識佢(兆尊)爸爸係邊個，但去年有搵過我，好矮冇頭髮，行很好快，好得意。我夢見過幾次，性格好百厭。」兆尊指之後都有畀祥哥張相太太睇，對方睇完就確定係祥哥。之後三太又透露有年七月十四祥嫂曾經搵過佢，三太憶述當時祥嫂嘅要求：「要求很高，要蓮花座，不要普通的金銀，要我買特別的衣紙去摺。」兆尊指太太嘅異能令佢嘅生命變得更豐富。