《開卷》今晚（8號）播出一集嘉賓係話題劇《婚後事》監製林肯同編審黃秉怡兩夫婦，佢哋喺節目中分享咗拍攝《婚》劇時所參考嘅兩本書《情欲徒刑》同《第三者的誕生》，作者都係婚姻治療師Esther Perel。黃秉怡提到故事緣起，係始於十年前老公嘅一則短訊「當時公司想拍一套講離婚嘅劇，忽然諗起10年前我哋未結婚嗰陣，佢send過婚姻治療師Esther Perel資料畀我，所以搵咗佢嘅書嚟睇，我哋套劇確實參考咗好多Esther寫嘅個案。」
劇中最引人爭論嘅係「羅子溢的思想出軌是否出軌」？佢認為議題可分成兩種，一係接觸唔到兼唔認識對方，黃秉怡解釋「例如你見到張相，而思想出軌，係避無可避。另一種係接觸到、有渠道溝通，而呢個想法令你有行動。劇集想講嘅係既然欲望咁強烈，係咪本身關係上出現問題？不忠係反映雙方關係係咪有所缺失？」佢忠告發現另一半出軌時，唔好以受害者身份自居，對雙方事後走出陰霾都無幫助。更唔好作偵探式查問，例如「你幾時幾日去咗邊」、「同邊個一齊」等審問式問題，而係以調查代替查問，檢討自身有甚麼不如對方嘅地方，佢指都係從兩本書中學到。
佢哋又自爆創作過程經常嘈交，且擦出「真火花」，林肯認真話「真係嗌交嗌到癲咗，佢痛苦唔會令我開心，都幾艱辛。但回望可以有機會開心拍一套大家喜歡嘅劇集，佢寫我執行去拍，其實都幾浪漫。」黃秉怡乘機「投訴」老公嘅鬼仔性格「佢話佢係鬼仔性格喎，係人都叫『傻豬』、『baby』。」旁邊嘅林肯立刻解釋，因為長時間喺外國生活，所以男女間嘅溝通會帶點flirty，佢話「原來太太好介意，明白到呢樣嘢令人有誤會，而你又無咁意思，有事時真係唔知點收科。」但隨即被太太一句KO，想知道黃秉怡點樣令林肯認輸，密切留意今晚（8號）節目播映。
《開卷》逢周一晚10點J2（82台）播映