古天樂與洪金寶首拍對打戲 林峯展現靈活身手飛簷走壁

新片《九龍城寨之圍城》將於5月1號隆重上映，片中男演員瞓身演出激烈武打場面，演活原著余兒筆下故事角色，洪金寶與古天樂首次上演銀幕對打，二人出手非同小可，連殿堂級動作導演洪金寶亦大讚古仔打得出色，今次戲中所見武打場面絕對係高手過招。

片中男演員瞓身演出激烈武打場面，演活原著余兒筆下故事角色。

新戲改編自余兒原著小說《九龍城寨》，滲入司徒劍僑《九龍城寨》漫畫式動作意念，由古天樂、林峯、劉俊謙及伍允龍等領銜主演，任賢齊、黃德斌、廖子妤、朱栢康及蔡思韵主演，洪金寶友情主演，全員瞓身激烈打鬥。
林峯展現靈活身手，飛簷走壁、跳躍瞓身，揮舞雙斧以寡敵眾，被古天樂、任賢齊打飛嘅場面，相信令觀眾睇得目定口呆；洪金寶與古天樂對打，舞動長棍怒插古仔喉嚨呢場係焦點所在。武打動作見稱嘅伍允龍踢飛電單車，黃德斌盲眼造型同時流出，分享眾演員喺拍攝前經過艱苦動作訓練，短短3分鐘預告令觀眾腎上腺素飆升。

黃德斌盲眼造型！

動作指導谷垣健治表示第一日要拍龍捲風必殺技，古仔每一下都係真力，洪金寶大哥就用盡全力去做，古仔與大哥拍完隨即問候大哥狀況，洪金寶風趣回應：「冇事﹗痛啫﹗」

任賢齊興奮分享今次要學洪拳及紮馬。

片中睇到林峯撞到手踭流露出痛苦表情，力臻完美要求重拍等：「用咗一個月訓練基本拳術，希望識拳術嘅人覺得有真實感。」任賢齊興奮分享今次要學洪拳及紮馬，一班年輕演員攞西洋刀、駕電單車追逐，跳躍及動作拍攝都非常精彩。

洪金寶與古天樂對打，舞動長棍怒插古仔喉嚨呢場係焦點所在。

古仔與洪金寶過往多次合作，但二人就未有認真對打過，古仔曾笑言被大哥大打係夢想之一。二人喺戲中分別飾演龍捲風及大老闆，前者奮力守護城寨希望城寨居民有安逸生活，後者無惡不作，只為賺取最大金錢利益， 洪金寶自言今次角色壞到不得了，不擇手段就是想搵錢，而洪金寶對古仔亦讚口不絕。

片中睇到林峯撞到手踭流露出痛苦表情，力臻完美要求重拍。

在戲中飾演大老闆頭馬王九嘅伍允龍，雖然跟大哥大多次合作，但喺大哥大面前感到有壓力，佢解釋一嚟對方係功夫界嘅大前輩，更係自己仰慕嘅偶像，每次見大哥大都會好恭敬。
劉俊謙騎飛電單車，胡子彤利落揮武士刀，張文傑凌空分腿。