Sammi（鄭秀文）自上年因病休養而久未公開露面，但佢喺休息嘅日子仍然努力鍛煉學習，喺社交平台頻頻分享做運動、學唱歌、學化妝嘅片段。經過一輪休息後，Sammi終於復出工作拍攝新廣告，以一身Deep V 露背戰衣華麗登場，若隱若現大騷無瑕光滑肌膚，狀態大勇！
Sammi腳踏7吋高踭鞋站上2米高台拍攝，臉部同動作神態盡顯女王風範。Sammi坦言為合作做咗不少功夫：「真係有好一段時間冇正式露面，中間想畀自己休息吓推辭咗好多工作，之前又唔小心整親隻眼，休息咗好一段時間。今次因為自己好鍾意呢個牌子，所以對於接拍呢輯廣告覺得好興奮！專登為咗呢輯廣告訂造呢條好華麗嘅長裙，希望俾到大家眼前一亮嘅感覺。」
而Sammi喺休養期間亦解鎖化妝新技能，向化妝師RickyLau取經，偶爾亦向YouTuber取經，一班粉絲都好期待Sammi未來可以拍YouTube化妝片同大家分享化妝技巧！Sammi就話：「化妝睇落好似好簡單，但要化得一手好妝，其實唔容易！以前你見我嘅舞台妝多數個重點係眉毛、眼妝、唇妝，但我開始發覺底妝的重要，我會花好多時間鑽研點樣化好一個底妝，睇落自然、無瑕，透到皮膚本身嘅光澤出嚟。同時一個好嘅底妝，仲可以令你望落後生咗，將瑕疵收埋。」