具俊曄對汪小菲指控感委屈 勁減13公斤稱老婆大S超鍾意

大S徐熙媛同汪小菲離婚超過兩年，但佢哋仲不時會因為糾紛而登上娛樂版，早前汪小菲曾大鬧小S徐熙娣台灣豪宅，更一度衝入警局話要實名舉報大S長期濫藥，仲直指大S喺閃婚具俊曄前經已有聯絡，指控大S婚內出軌。

對於汪小菲又再牽事端，作為大S現任丈夫嘅具俊曄，呢日現身時都大方回應，直言因為並非事實嘅關係，令佢覺得好鬱悶同委屈，具俊曄又指關於佢嘅指控都唔係事實，檢方亦為佢證明清白，至於汪小菲指大S婚內送佢禮物呢點，更加令佢感到無語，同時亦一直忍耐。

具俊曄話自己係個比較情緒穩定嘅人，所以佢本人冇受影響，但係大D就直接受到呢啲新聞影響，所以自己只好一直陪伴住老婆。

其實呢日具俊曄係為佢嚟緊嘅DJ騷宣傳，喺3個月內勁減13公斤嘅佢瘦咗又年青咗，對於oppa呢個改變，具俊曄話大S都相當鍾意，之後又公開放閃話老婆一直係自己力量嘅來源，同時亦係佢嘅靈感女神，只要大S對住佢笑，就會令佢充滿力量，搞到在場記者紛紛話肉麻，點知具俊曄繼續投擲閃光彈，話自己以前唔識用言語嚟表達自己，但喺大S身邊時，就覺得要好好咁表達，咁樣先唔會後悔，所以喺大S面前會毫無保留呀！

而另一邊廂嘅汪小菲亦間中會同新任未婚妻Mandy放閃，最近佢就曬出同Mandy遊首爾嘅合照，網民話見女方腹部微隆，引嚟奉子成婚嘅猜測呀。